Ресей өкілі Кирилл Дмитриев: Энергетикалық дағдарыс ЕО мен Ұлыбританияға экономикалық «цунами» әкеледі

Еуропалық Одақ пен Ұлыбритания мамыр айында ауыр энергетикалық күйреуге тап болуы мүмкін. Бұл туралы Ресей тікелей инвестициялар қорының  (РТИҚ) басшысы, Ресей президентінің шетелдермен инвестициялық-экономикалық ынтымақтастық жөніндегі арнайы өкілі Кирилл Дмитриев X әлеуметтік желісіндегі парақшасында мәлімдеді, деп хабарлайды Orda.kz.      

Дмитриевтің пікірінше, алдағы «энергетикалық дағдарыс цунамиі» Еуропа елдеріне орасан экономикалық шығын әкеледі. Ол ЕО мен Ұлыбритания сыртқы жау іздеудің орнына, аман қалу үшін өз тәсілдері мен шараларын шұғыл түрде өзгертуі қажет екенін ескертті.

Энергетикалық нарықтағы жағдай 13 сәуірден бастап ушыға түсті. Сол күні АҚШ әскери-теңіз күштері Ормуз бұғазы арқылы өтетін теңіз жолына блокада бастаған. Бұл тар өткел арқылы әлемдік мұнай мен сұйытылған табиғи газ жеткізілімінің шамамен 20 пайызы тасымалданады.

Бұған дейін Дмитриев  Эммануэль Макронның АҚШ, Ресей және Қытай көшбасшылары Еуропаға қарсы бағытталған деген мәлімдемесіне де пікір білдірген еді. Оның айтуынша, елдер «жаһанданудың вирусы» жеңілгеннен кейін бір-бірімен ынтымақтастық орнатады.

Айта кетейік, РТИҚ — Ресей тікелей инвестициялар қоры. Бұл алдыңғы қатарлы шетелдік және ресейлік инвесторлармен бірлесе отырып, перспективалы компанияларды (негізінен РФ-да) акционерлік капиталға бірлесіп инвестициялау үшін 2011 жылы құрылған Ресей Федерациясының егеменді инвестициялық қоры. 

Оқи отырыңыз:

• Ормуз ашылды, бірақ қысым сақталады: Иран, Трамп және мұнай нарығы қалай өзгерді?
• Макрон Еуропаны «оянуға» шақырып, Ресей, Қытай мен АҚШ қарсылығын еске салды
• Иран Ормуз бұғазының қайта жабылғанын мәлімдеді