Qatar Airways инсульт алған қазақстандық әйелді ауруханасы жоқ аралда қалдырды

Qatar Airways рейсінде инсульт алған қазақстандық әйел 16 сағат бойы медициналық көмексіз қалған, деп хабарлайды Orda.kz.

Әсем атты келіншек Qatar Airways әуе компаниясын анасына дер кезінде медициналық көмек көрсетілмеді деп айыптады. Оның айтуынша, Дохадан Майамиге бағыт алған рейсте инсульт алған анасын экипаж Азор аралдарының біріне түсіріп кеткен. Алайда ол жерде қажетті медициналық көмек көрсетілмеген.

Әйелдің сөзінше, анасы Алматыдан Доха арқылы Майамиге ұшып бара жатқан. Ұшақ Майамиге жетуге шамамен үш сағат қалғанда жолаушының жағдайы күрт нашарлап, инсульт алған. Қызы экипаждың шұғыл қону туралы шешіміне қарсы емес екенін, бірақ науқасты медициналық инфрақұрылымы жоқ Санта-Мария аралына қалдырғанын түсінбейтінін айтады. Сонымен қатар, келіншек анасының қасында егде тартқан мүгедек әкесінен басқа ешкім жоқ екенін айтты. 

«Анамды Санта-Мария аралына түсірді. Ол жерде әуежай болғанымен, қажетті медициналық көмек көрсететін аурухана жоқ. Жедел жәрдем келгенімен, кардиограмма да түсірмеді, ешқандай ем-дом жасаған жоқ. Кейін оны әскери ұшақпен басқа аралға жеткізді. Соның салдарынан анам 16 сағат бойы ешқандай медициналық көмексіз қалды», — деді Әсем.

Әйелдің айтуынша, анасы ауруханаға инсульттен кейін тек 16 сағат өткен соң жеткізілген. МРТ зерттеуі де келесі күні ғана жасалған. Қазір әйел есін біледі, алайда оның сол қолы мен сол жақ дене бөлігі сал болып қалған. Қызы алғашқы сағаттар инсульт кезінде шешуші рөл атқаратынын айтып, Qatar Airways әрекетіне шағымданды.

«Ұшқыштар хаттама бойынша әрекет еткен шығар. Бірақ адамды медициналық көмек ала алатын жерге жеткізу керек еді. Инсульт кезінде әр минут маңызды. Анамды ешқандай мүмкіндік жоқ аралда қалдырып кетті», — деді қызы.

Сонымен қатар, ол анасының жүгінің қайда екені де белгісіз болып қалғанын айтты. Оның сөзінше, компания қызметкерлері шабандардың орналасқан жері туралы нақты ақпарат бере алмаған. Осы жазбадан кейін, көпшілік Qatar Airways компаниясын белгілеп, шағымданушылар саны артты. Қазіргі уақытты келіншек ата-анасын ол жақтан алып келу жолдарын іздестіріп жатыр.

Оқи отырыңыз:

Air Astana Дубайға ұшатын барлық рейсін тоқтатты

«BaiQymyz-2026»: Қымыздың көкесін кімнен аламыз?