Air Astana Дубайға ұшатын барлық рейсін тоқтатты

Қазақстандық Air Astana әуе компаниясы Таяу Шығыстағы жағдайдың ушығуына байланысты Дубай бағыты бойынша рейстердің барлығын тоқтататынын мәлімдеді, деп хабарлайды Orda.kz компанияның баспасөз қызметіне сілтеме жасап.

Әуе компаниясының мәліметінше, Таяу Шығыстағы жағдайдың одан әрі шиеленісуіне байланысты Біріккен Араб Әмірліктерімен әуе қатынасы уақытша тоқтатылады.

Атап айтқанда:

13 және 14 шілдеге жоспарланған KC897/898 Алматы – Дубай – Алматы рейстері,
14 шілдеге жоспарланған KC205/206 Астана – Дубай – Астана рейстері тоқтатылды.

Жолаушыларға билетті сатып алған жері бойынша толық қайтарым немесе 12–18 шілде аралығына жоспарланған рейстерді 31 шілдеге дейінгі басқа рейстерге тегін қайта брондау мүмкіндігі ұсынылады.

«Рейстер кестесіндегі алдағы өзгерістер туралы қосымша хабарланады. Air Astana жағдайды мұқият бақылап, жолаушыларды елге қайтару мәселелерін шешіп жатыр»,  деп хабарлады компания. 

Еске салайық, бұған дейін 28 ақпанда Air Astana Иран төңірегіндегі жағдайға байланысты Таяу Шығысқа рейстерді 3 наурызға дейін тоқтатқан болатын. Кейін Дубайға рейстер сәуір айының соңына дейін орындалмады.

Ал 5 маусымда әуе компаниясы Дубаймен әуе қатынасы қайта жандана бастағанын хабарлаған еді. Кеше ғана Таяу Шығыстағы жағдайға байланысты Астана–Дубай рейсі кері қайтты.

Жолаушыларға рейстердің мәртебесін алдын ала тексеріп отыру ұсынылды, өйткені ұшу және қону уақыттарында өзгерістер күтіледі.

Air Astana рейс мәртебесін тексеруге арналған байланыс нөмірлерін жариялады:

Тапсырыс беру және ақпарат орталығы (тәулік бойы):   help.airastana.com+7 727 244 4477+7 7172 584477+7 702 702 4477

Оқи отырыңыз:

• Таяу Шығыстағы жағдайға байланысты Астана–Дубай рейсі кері қайтты
• Еуропадағы аптап ыстық 10 мыңнан астам адамның өмірін жалмады
• ӘЧ-2026: FIFA финал өткен алаңды бөлшектеп, сатылымға шығарды