Путин әулетінің досы Қазақстанда ірі дәрі-дәрмек зауытын салады

Khan Tengri Biopharma компаниясы құрылғанына бір жыл да толмағанымен, қазірдің өзінде бірқатар жеңілдіктерге ие болып отыр, деп хабарлайды Orda.kz.

Алматы қаласындағы «Алатау» арнайы экономикалық аймағында құны 103 миллиард теңге болатын жаңа биофармацевтикалық кешен салынбақ. Жобаны Khan Tengri Biopharma компаниясы жүзеге асырады. Зауыт онкологиялық, аутоиммундық, сирек және қабыну ауруларына арналған дәрілерді қоса алғанда, барлығы 58 түрлі дәрілік препарат өндіреді деп күтілуде. Олардың 27-сі — халықаралық патенттелмеген атаулар.

Билік өкілдері жаңа зауыт импортқа тәуелділікті азайтып, елдің дәрілік қауіпсіздігін арттыруға ықпал етеді деп есептейді. Өнімнің бір бөлігі экспортқа — ЕАЭО, ТМД елдеріне және Таяу Шығыс мемлекеттеріне жеткізілмек.

Бірнеше ай бұрын Orda.kz Khan Tengri Biopharma туралы жазған болатын. Компания инвестициялар туралы келісімнің арқасында мемлекеттік тапсырыстарға басым қол жеткізу мүмкіндігіне ие болды. Бұл — мемлекеттік қолдаудың жаңа тетігі.

Аталған компания 2025 жылдың наурыз айында ғана тіркелген. Оның құрылтайшыларының қатарында ресейлік «Р-Фарм» компаниясы бар. Бұл компания Батыс санкцияларына іліккен кәсіпкер Алексей Репикпен байланысты. Ресейлік журналистік зерттеулерде Репикті Путин әулетінің досы деп атайды.

Сарапшылар мұндай келісімдерге қатысушыларды іріктеу үдерісінің ашықтығына күмән келтіріп отыр. Дегенмен Khan Tengri Biopharma-мен жасалатын келісім жобасы әлі де келісу сатысында.

Былтыр Қытайлық биофармацевтикалық компания Қазақстанда құны 150 миллион доллар болатын крахмал өндіретін зауыт салатыны белгілі болған.

Тақырыпқа қатысты оқи отырыңыз:

Трамадол Қазақстандағы есірткі заттарының тізіміне енді.

Қазақстанда дәрі-дәрмек өндірісінің көлемі 95 миллиард теңгеге жетті.

Мәжіліс депутаты Базарбек Бас прокуратураға бірден төрт арыз дайындады.