Мәжіліс депутаты Базарбек Бас прокуратураға бірден төрт арыз дайындады

Мәжіліс депутаты Бақытжан Базарбек Бас прокуратураға бірден төрт өтініш тапсыратынын мәлімдеді. Ол бірқатар ірі заңбұзушылықтар бойынша қылмыстық іс қозғауды талап ететінін айтты, деп хабарлайды Orda.kz.

Бірінші өтініш — Жоғары аудиторлық палата жүргізген тексеріс нәтижесіне қатысты. Ол фармацевтика саласын, нақтырақ айтқанда «СК-Фармация» компаниясы мен ірі фармкомпаниялардың қызметіне қатысты іс.

Екінші өтініш — Міндетті әлеуметтік медициналық сақтандыру (МӘМС) жүйесіндегі қаражат ұрлығына қатысты.

Үшінші өтініш — ауыл шаруашылығы саласындағы субсидиялардың мақсатсыз жұмсалғаны бойынша.

Төртінші өтініш — 27 маусымда парламент бекіткен үкіметтің есебіне қатысты жолданбақ.

«Менің өзгелерден айырмашылығым — істі соңына дейін жеткіземін. Қылмыстық іс қозғалып, тергеу жүргізіліп, айыптыларды тұтқындамайынша тоқтамаймын», — деді депутат.

Сонымен қатар, Базарбек бесінші сессияға дейін бақылаушы органмен тығыз жұмыс істеп, барлық процесті жеке өзі бақылауда ұстайтынын да атап өтті.