Павлодардағы Halyk Bank бөлімшесін тонау ісі бойынша жаңа мәліметтер белгілі болды

Павлодар облысының полициясы Halyk Bank бөлімшесіне жасалған тонау ісі бойынша жаңа деректерді жариялады. Қылмыс жасалғанына шамамен екі жылға жуық уақыт өтсе де, күдіктілердің екеуі әлі күнге дейін іздеуде жүр, ал тергеу халықаралық деңгейге шықты. Бұл туралы Orda.kz irbistv.kz сайтына сілтеме жасап хабарлайды.

Тонау оқиғасы 2024 жылғы 10-нан 11 қарашаға қараған түні Павлодар қаласындағы Естай көшесінде орналасқан тұрғын үйдің бірінші қабатындағы Halyk Bank бөлімшесінде болған. Қаскөйлер жертөле жақтан қабырғаны бұзып, банк ғимаратына кіріп, құнды заттарды алып кеткен. Ұрлық фактісін банк қызметкерлері таңертең жұмысқа келген кезде анықтаған.

Полицияның хабарлауынша, қылмыстан кейін шамамен екі апта ішінде бес күдіктінің жеке басы анықталған. Алайда тергеу әлі де жалғасып жатыр, болжамды екі қатысушының кім екені анықталмаған, олар іздеуде.

Павлодар облысы полиция департаменті бастығының бірінші орынбасары Болат Нұрсейітовтің айтуынша, іс бойынша халықаралық өзара іс-қимыл жалғасуда. Жуырда Павлодар облысы ПД қызметкерлері Грузия мен Арменияға барып қайтқан.

Қолда бар мәліметтерге сәйкес, тонауға қатысқан сыбайластар сол елдерде болуы мүмкін. Аталған мемлекеттер тарапынан жан-жақты құқықтық көмек көрсетіліп, қажетті тергеу әрекеттері жүргізілген. Жиналған материалдарды Ресей Федерациясының прокуратурасына жолдау жоспарланып отыр.

Қылмыстық іс Ресейдің құқық қорғау органдарына берілген. Аймақтық полиция департаментінің түсіндіруінше, бұл — қалыпты тәжірибе, себебі күдіктілер көрші мемлекеттің азаматтары. Сондықтан сот процесі Ресей заңнамасына сәйкес өтеді.

Іс бойынша шамамен 40 адам жәбірленуші деп танылған, олардың басым бөлігі  Павлодар облысының тұрғындары. Тергеу жалғасуда.

Еске салсақ, «АЛМЭКС» холдингі, яғни Halyk Bank акцияларының шамамен 70 пайызына иелік ететін компания, банктің төрт пайызға жуық үлесін нарыққа шығаратынын мәлімдеді. Қазіргі бағаммен есептегенде құны 159 млрд теңге шамасында. 

Оқи отырыңыз:

• Тоқаев банктер туралы жаңа заңға қол қойды: қандай өзгеріс болады
• Алыпсатарлар кесірінен теңге күрт құлдырауы мүмкін
• Елімізде банктер бірін-бірі жұтып жатыр, оның салдары қандай болады?
• Қазақстандықтар шетелмен де трансшекаралық QR-төлем жасайды