Павлодардағы банкте петарда жарған қарттардың халі қалай?

Павлодардағы банкте петарда жарылысы салдарынан зардап шеккен қарттар амбулаторлық емге жіберілді. Дәрігерлер олардың қолы жарақаттанып, кей жерлері күйіп қалғанымен, стационарда қалдыру қажет деп таппаған, деп хабарлайды Orda.kz.

Павлодар облыстық денсаулық сақтау басқармасы баспасөз қызметінің мәліметінше, 15 шілде күні облыстық ауруханаға бейнекамераға түсіп қалған оқиғадан кейін егде жастағы ерлі-зайыпты жеткізілген.

Әйелдің оң қолының басы мен білегі жарақаттанған (еттің жыртылуы, соққы, сырылған жерлер), беті, мойны және екі қолында I–II дәрежелі термиялық күйік бар (терінің шамамен 5%-ы зақымданған), сондай-ақ көзінің жеңіл дәрежелі күйігі анықталған. Офтальмологтар ер кісінің тек көзінің жеңіл күйігін тіркеген.

«Жарақатты таңып, офтальмологиялық көмек көрсетілгеннен кейін ол кісілер тұрғылықты жері бойынша амбулаторлық ем алуға жіберілді», деп хабарлады ведомство. 

Бұған дейін зейнеткерлер банк ғимаратына ішінде петардасы бар торт әкеліп, оны телефон алаяқтарының ықпалымен тұтатқан.

Алаяқтар қарттарға бұрын жалған инвестицияға жоғалтқан ақшаларын қайтарып береміз деп уәде беріп, оларды осы қауіпті әрекетке итермелеген. Қазіргі таңда полиция қылмыстық іс қозғап, күдіктілерді іздестіріп жатыр.

Оқи отырыңыз:

• Алматыда қызды аяусыз ұрып-соғып, видеоға түсіріп таратқан
• Президент Қытайда: «Қазақстанды Орталық Азиядағы жетекші AgriTech хабы ретінде дамытамыз»
• «Семей орманы» аумағындағы алапат өртті сөндіруге авиация тартылды