Павлодарда 34 миллион теңгеге жөнделген көпір суға батты

Павлодар облысында 34 млн теңгеге жөнделген көпір бір жылдан кейін қайтадан суға батып кетті. Белая өзені арқылы өтетін жалғыз өткелден айырылған төрт ауылдың тұрғындары әкімдіктің әрекетсіздігіне шағымдануда, деп хабарлайды Orda.kz.

Әлеуметтік желіде Ақсу қаласына қарасты Көктас ауылындағы көпірдің су астында қалғаны түсірілген видео тарады. Бейнежазба авторлары жергілікті биліктің мәселені шешуге асықпайтынын айтып шағымданып жатыр. Енді олар мал азығын дайындайтын шабындықтарға өте алмай отыр.

Ақсу қаласы әкімдігінің мәліметінше, ұзындығы 66 метр, ені 7 метр болатын понтон көпір 2006 жылдан бері пайдаланылып келеді. Ол Белая өзенінің арғы жағындағы шабындықтарға қатынау үшін қажет. 

Әкімдіктің мәліметінше, понтон көпірге өткен жылы «СтройЭталон» ЖШС ағымдағы жөндеу жұмыстарын жүргізген. Оған бюджеттен 34 млн теңге жұмсалған. Алайда арада көп уақыт өтпей-ақ көпірден ақаулар шыға бастаған екен. 

«Биыл сәуір айында көпірді пайдалану барысында дәнекерленген тігістердің ажырауы және құрылғының тозғаны анықталды. Кейін көктемгі су тасқыны кезінде көпір су астында қалып, пайдалануға жарамсыз болды»,  деп хабарлады Ақсу қаласы әкімдігі.

Осыған байланысты ауылдық округ әкімдігі мердігер компанияны кепілдік міндеттемелерін орындауға міндеттеу үшін сотқа жүгінген. Істі қарау барысында тараптар медиативтік келісімге келген.

«Медиациялық келісімге сәйкес, «СтройЭталон» ЖШС көпірді қалпына келтіру жұмыстарын 2026 жылғы 25 шілдеге дейін аяқтауға міндеттенді. Қосымша бюджет қаражатын бөлу қарастырылмайды, жөндеу жұмыстары мердігердің кепілдік міндеттемелері аясында жүргізіледі»,  деп мәлімдеді әкімдік.

Айта кетейік, Көктас ауылындағы бұл понтон көпір  өткен жылы да суға батып кеткен болатын.

Оқи отырыңыз:

Семейде 8 және 14 жастағы екі бала із-түзсіз жоғалып кетті

Молдахан: «Мен шындықты айтқанымды мойындаймын»: Ұзабаев пен Шұмаев кешірім бере ме?