Бір серіктестіктің алты бірдей жұмысшысы құдыққа түсіп қаза тапқан: Полиция үш адамды ұстады

Павлодар облысы полиция департаменті жергілікті жауапкершілігі шектеулі серіктестіктің алты бірдей жұмысшысы қаза тапқан оқиғаға байланысты үш күдіктінің ұсталғанын мәлімдеді, деп хабарлайды Orda.kz.       

Еске салайық, 20 шілдеде Павлодар облысы Ақтоғай ауданы Жоламан ауылындағы кәсіпорында кәріз құдығындағы электр сорғысы ақауын жөндеу жұмыстары кезінде алты адам қаза тапқаны туралы ақпарат тараған еді. Марқұмдардың ең жасы – 16 жастағы бозбала.

Сол кезде тағы бір адамның ауруханаға жеткізілгені хабарланған болатын. 

Павлодар облысы полиция департаментінің мәліметінше, аталған факті бойынша қылмыстық іс қозғалған. Алайда тергеу мүддесіне байланысты өзге ақпарат жарияланбаған.

11 тамызда облыстық полиция департаментінің баспасөз қызметі бұл іс бойынша Тергеу басқармасы сотқа дейінгі тергеу жүргізіп жатқанын мәлімдеді.

«Қылмыстық іс аясында оқиғаның барлық мән-жайын анықтауға бағытталған қажетті тергеу шараларының кешені жүргізілуде. Қазіргі уақытта үш күдікті ұсталып, уақытша ұстау изоляторына қамалды. Қазақстан Республикасы Қылмыстық-процестік кодексінің 201-бабына сәйкес, тергеу мүддесіне байланысты өзге ақпарат жария етілмейді», – деп хабарлады полиция департаменті өкілдері. 

Алдын ала мәлімет бойынша, жауапкершілігі шектеулі серіктестік аумағында бірнеше адам құдыққа түсіп, сол жерде көз жұмған. Бейресми ақпаратқа сәйкес, олар құдықтағы ақауды жөндеу үшін түскен.

Оқи отырыңыз:

• Павлодар облысында құдыққа түскен алты адам қаза тапты: Марқұмдардың ең жасы 16 жаста
• Сирияның бұрынғы президенті Башар Асад сырттай өлім жазасына кесілді