Парсы шығанағы елдері Иранның Иордания, Кувейт және Бахрейнге жасаған шабуылдарын айыптады

Парсы шығанағындағы бірқатар мемлекеттер Иранның Иордания, Кувейт және Бахрейн аумақтарына жасаған соққыларын қатаң сынға алды, деп хабарлайды Orda.kz.

Қатар мен Біріккен Араб Әмірліктерінің Сыртқы істер министрліктері таратқан мәлімдемелерде бұл әрекеттер аталған елдердің егемендігіне және халықаралық құқық нормаларына өрескел қайшы келетіні айтылған.

Қатар СІМ Иранның әскери әрекеттерін айыптап, өңірдегі тұрақтылық пен қауіпсіздікке қатер төндіретін кез келген қадамға қарсы екенін мәлімдеді. Ведомство Иордания, Кувейт және Бахрейнмен толық ынтымақтастық танытып, олардың қауіпсіздігі мен аумақтық тұтастығын қолдайтынын жеткізді.

Осындай мәлімдемені Біріккен Араб Әмірліктерінің Сыртқы істер министрлігі де жасады. Әмірліктер тарапы шабуылдарды халықаралық құқық пен мемлекеттердің егемендігін құрметтеу қағидаттарын бұзу деп бағалады.

Өңір елдері Таяу Шығыстағы шиеленістің одан әрі ушығуына жол бермеуге шақырып, даулы мәселелерді дипломатиялық жолмен шешудің маңыздылығын атап өтті.

Иранның аталған мемлекеттерге жасаған соққылары аймақтағы қауіпсіздік жағдайына қатысты алаңдаушылықты күшейтіп отыр. Сарапшылардың пікірінше, оқиға Таяу Шығыстағы геосаяси ахуалдың одан әрі күрделенуіне әсер етуі мүмкін.
 

Оқи отырыңыз: 

• Тергеудегі Тәшиев көпшілік алдына шығып Жапаровты мақтады
• АҚШ Иранға қарсы жауапты соққы берді: Ормуз бұғазындағы шиеленіс күшейді