Пакқа қатысты үкімнен кейін кісі өлімі болған жол апаты үшін жазаны қатаңдатуды талап еткен петиция жарияланды

Пакқа қатысты үкімнен кейін Қазақстанда жол-көлік оқиғалары үшін жазаны қатаңдатуды талап еткен петиция пайда болды, деп хабарлайды Orda.kz.       

Алматыдағы әл-Фараби даңғылында болған өліммен аяқталған жол-көлік оқиғасы бойынша үкім шыққаннан кейін, арнайы сайтта мас болып көлік жүргізіп, адам өліміне әкелген жүргізушілерге жазаны қатаңдату туралы ұсыныс енгізілген петиция жарияланды.

Бастама көтергендер қолданыстағы заңнама мұндай апаттардың салдарына сай келетін жаза тағайындауға мүмкіндік бермейді деп есептейді. Олар Александр Пак ісі бойынша сот ең жоғары жаза — 10 жыл бас бостандығынан айыру және өмір бойы көлік жүргізу құқығынан айыру жазасын тағайындағанын атап өтті. Алайда петицияда айтылғандай, қолданыстағы нормаларға сәйкес сотталған адам жазасын қауіпсіздігі төмен мекемеде өтейді.

Еске салайық, 22 маусым күні кешке Алматы қаласының қылмыстық істер жөніндегі мамандандырылған ауданаралық соты Александр Пакты әл-Фараби даңғылындағы өлімге әкелген жол апаты бойынша кінәлі деп таныды. Сот оны 10 жылға бас бостандығынан айырып, өмір бойы көлік жүргізу құқығынан айырды. Жол апаты салдарынан үш адам қаза тапты. Бұған дейін прокурор да айыпталушыға ең жоғары жаза тағайындауды сұраған болатын.

Сонымен қатар жарияланған бастама мемлекеттік петициялар порталында орналастырылмаған. GosRating.com өзін азаматтық петициялар мен қоғамдық бастамаларды жариялауға арналған тәуелсіз онлайн-платформа ретінде таныстырады.

Бұның ресми ePetitions сервисінен айырмашылығы — бұл сайтта жарияланған петициялар көп қол жинағанның өзінде мемлекеттік органдар тарапынан міндетті түрде қаралуы талап етілмейді.

Оқи отырыңыз:

• Әл-Фарабидегі апат: Сот Пакты 10 жылға бас бостандығынан айырды
• «Ақша үшін емес»: Томиристің анасы Пакты не үшін кешіргенін айтса, әкесі 100 млн теңге талап етті
• Қандай пост, пікір, репост үшін 20 жыл түрме беріледі? Прокуратура қазақстандықтарға ескерту жасады