Пәкістанда мешітте болған жарылысты ДАИШ мойнына алды

Пәкістан астанасы Исламабадта мешітте жасалған жантүршігерлік теракт үшін жауапкершілікті «Ислам мемлекеті» (ДАИШ) террористік ұйымы өз мойнына алды, деп хабарлайды Orda.kz.  Бұл туралы SITE Intelligence Group таратқан ұйым мәлімдемесінде айтылған.

Мәлімдемеде жанкешті шабуыл жасаушының мешіттің ішкі қақпасына жеткен соң, шиит қауымының ортасында жарылғыш зат салынған белбеуін іске қосқаны көрсетілген. Соның салдарынан көптеген адам қаза тауып, ондаған адам жараланған.

Пәкістанның қорғаныс министрі Хаваджа Асиф жанкештінің бұған дейін Ауғанстанға бірнеше рет барғаны тіркелгенін мәлімдеп, терактіні қаржыландыруға Үндістанның қатысы болуы мүмкін екенін айтты. Алайда Үндістан билігі бұл айыптауларды «негізсіз» деп, шабуылды қатаң айыптады.

Қанды оқиға 6 ақпан күні Исламабадтағы шиит мешіттерінің бірінде болған. Ғимарат ішінде жасалған жарылыс салдарынан 31 адам қаза тауып, 170-тен астам адам түрлі дәрежеде жарақат  алған.

Айта кетейік, ДАИШ — Қазақстан аумағында қызметіне тыйым салынған террористік ұйым.

Шетел жаңалықтарын оқи отырыңыз:

• Иранда әйелдерге мотоцикл айдауға және жүргізуші куәлігін алуға рұқсат берілді
• Әбу-Дабиде Украина мен Ресей арасындағы соғысты тоқтатуға алғашқы қадам жасалды
• Әзірбайжанда мектеп оқушысы мұғаліміне оқ атты