Иранда әйелдерге мотоцикл айдауға және жүргізуші куәлігін алуға рұқсат берілді

Иран билігі әйелдерге жасалған көп жылдық қысымды жеңілдетті. Енді ирандық қыз-келіншектер мотоцикл жүргізу үшін ресми куәлік ала алады, деп хабарлайды Orda.kz Iranintl.com сайтына сілтеп. 

Бұған дейін әйелдерге мотоцикл жүргізуге тікелей тыйым салынбаған. Алайда іс жүзінде полиция оларға лицензия беруден бас тартып келген. Жаңа ереже бойынша, ирандық әйелдерге мотоцикл сатып алуға және тіркеуге рұқсат етілді. 

Қаулыға сәйкес, жол полициясы әйелдердің жол жүрудегі практикалық даярлығын қамтамасыз етуге, емтихандарды құқық қорғау органдарының тікелей бақылауымен өткізуге және әйелдерге мотоцикл басқаруға арналған ресми жүргізуші куәлігін беруге міндетті.

Бұл шешім елде болған ауқымды наразылықтар аясында қабылданды. Бастапқыда экономикалық қиындықтардан туындаған бұл шеру өткен айда жалпыұлттық үкіметке қарсы бас көтеруге ұласты. Оларды басып-жаншу көптеген адам шығынына әкелді. Билік 5 мыңнан астам адамның қаза тапқанын айтса, құқық қорғау ұйымдары бұл көрсеткіш әлдеқайда жоғары екенін айтады.

1979 жылғы Ислам революциясынан кейін Ирандағы әйелдер қатаң әлеуметтік шектеулерге тап болды. Олардың қоғамдық ортадағы орны елеусіз қалды.

Оқи отырыңыз:

• Иран билігі наразылық кезінде 5 мың адам қаза тапқанын хабарлады
• Еурокомиссия басшысы Ирандағы зорлық-зомбылықты айыптап мәлімдеме жасады