Ошта саудагерлер құлпынай сатқызбаған фермерге базардан сауда орны берілді

Оштағы базарда құлпынай сатпақ болған фермерге басқа саудагерлер жабылып, өнімін таптап, өзін соққыға жықты. Оқиға қоғамда қызу талқыға түсіп, күтпеген жерден бсқаша сипат алып, қала әкімдігі зардап шеккен азаматқа базардан арнайы сауда орнын бөліп берді,деп хабарлайды Orda.kz.

Қырғызстанның әлеуметтік желісінде тарап кетккен базардағы оқиға Ош қаласында болған. БАҚ-мәліметінше, фермер базарға өзі өсірген құлпынайын сатуға келген. Алайда, бұл өзге сатушылардың наразылығын туғызып, жанжал соңы төбелеске ұласып кеткен. Саудагерлердің төрт-бесеуі жабылып, фермердің құлпынайын жан-жаққа шашып таптап, өзінің үстіндегі жейдесін жыртып тастаған. 

Бұл видео әлеуметтік желіде қызу талқыға түсті. Саудагерлердің соққысының астында қалған фермерге таптап тастаған құлпынайдың ақшасын желі қолданушылары өздері жинап беруді ұсынып жазып жатты. Ал Ош қалалық ішкі істер басқармасы аталған оқиғаны тіркеуге алғанын хабарлады. Басқарманың мәліметінше, жанжалға қатысушылар анықталып, тергеу бөліміне жеткізілген. Қазіргі уақытта оқиға бойынша тексеру жүргізіліп жатыр. 

Сонымен қатар, Ош қаласының әкімі Жанар Ақаев фермерлердің еңбегі, олардың кім екеніне және не өсіретініне қарамастан, әрдайым құрметтелуі тиіс екенін атап өтті. 

«Мен қалалық милиция басшысымен сөйлестім. Заң аясында тиісті шаралар қабылданады. Ош тұрғындарына үндеу жасағым келеді. Біз бәріміз бір қалада тұрамыз. Қоғамдық көлікте де, базарда да, көшеде де, моншада да еш жерде агрессия болмауы тиіс. Бір-бірімізге құрметпен қарауымыз керек. Төбелес пен жанжал ешқандай мәселені шешпейді. Агрессия көрсеткендерге қатысты милиция заңға сәйкес шара қолданады», – деді Жанар Ақаев.

Осы оқиғадан соң фермерді базардың директоры арнайы шақырып оған сауда орнын берді. Бұл фермердің өзі өсірген құлпынайын сатып, адал еңбегімен табыс табуына мүмкіндік береді. Кейінірек фермерге базардағы өзіне бөлінген сауда орны көрсетілді.

Оқи отырыңыз:

Алматының 34 жастағы тұрғыны өгей әкесін пышақтап тастады

«Ауыл» партиясы Құрылтай сайлауына 69 кандидат ұсынады