Оңтүстік Кореяның экс-президентіне өлім жазасы төніп тұр

Оңтүстік Корея прокуратурасы елдің бұрынғы президенті Юн Сок Ёльге өлім жазасын тағайындауды талап етті. Бұл — бүлік ұйымдастырғаны үшін көзделген ең ауыр жаза. Бұл туралы Orda.kz «Рёнхап» агенттігіне сілтеме жасап хабарлайды.

Айыптау қорытындысында президенттің 2024 жылғы 3 желтоқсанда соғыс, қарулы қақтығыс немесе ұлттық дағдарыс белгілері болмағанына қарамастан, әскери жағдай енгізу арқылы бүлікке арандату мақсатында Оңтүстік Кореяның бұрынғы қорғаныс министрі Ким Ён Хёнмен және өзге де тұлғалармен сөз байласқаны айтылған.

Юн Сок Ёль бұған дейін әскери жағдай енгізуді үкімет жұмысына тұсау салды деп өзі сипаттаған «мемлекетке қарсы» оппозициядан елді қорғау қажеттілігімен түсіндірген еді.

 Алайда бірнеше сағаттан кейін әскери жағдайдың күші жойылды. Кейін парламент екінші талпынысында президентке импичмент жариялағанымен, оны қызметінен түпкілікті түрде тек Конституциялық сот қана шеттете алды.

Юн Сок Ёль өзіне тағылған бүлік ұйымдастыру айыбын мойындаған жоқ. Оның жұбайы да қамауға алынған.

Бұл іс бойынша соттың түпкілікті үкімі ақпан айының басында шығарылады деп күтілуде.

Еске салсақ, былтырғы тамыз айында бұрынғы бірінші ханымға парақорлық және акциялар арқылы алаяқтық жасады деген айыптар тағылып ұсталды. Yonhap агенттігінің мәліметінше Сеул соты арнайы прокурордың өтініші бойынша оны қамауға алу туралы ордер берді.

Тақырыпқа сай қосымша ақпарат:

• Оңтүстік Корея президенті қызметінен біржола шеттетілді
• Оңтүстік Кореяның жаңа президенті кім болады?
• Оңтүстік Корея әскери төтенше жағдай жариялады
• Оңтүстік Корея президенті өлім жазасына кесілуі мүмкін