«Денис Теннің өлімі»: Жоғарғы сот шағымды кейінге қалдырды

Жоғарғы сот Арман Құдайбергенов пен Нұралы Қиясовтың Денис Теннің өліміне қатысты берген кассациялық шағымын қарауды кейінге қалдырды. 

Денис Теннің өліміне қатысты айыптылар Жоғарғы Сотқа кассациялық шағым жазған болатын.

Orda.kz осы мәселе бойынша Жоғарғы сотқа хабарласты. Жоғарғы сот шағымды кейінге қалдырғанын растады.

Сот алқасы қосымша іс материалдарын сұрату туралы шешім қабылдап, отырысты кейінге қалдырды. Отырыс Zoom платформасы арқылы онлайн форматта өтті, оған сот мүшелері мен сотталушылардың адвокаттары ғана қатысты.

Еске сала кетейік, Денис Тен 2018 жылғы 19 шілдеде көлігінің айнасын ұрламақ болған қылмыскерлердің қолынан қаза тапты. Спортшы пышақ жарақатынан көп қан жоғалтып, өлім аузында ауруханаға жеткізілген болатын.

Арман Құдайбергенов пен Нұралы Қиясов 18 жылға қатал режимдегі колонияға қамалды. Ал Жанар Толыбаева қылмыс туралы полицияға хабарламағаны үшін 4 жылға сотталды.