Нұржан Бексұлтанова халықаралық жүлдеге ие болды

«Әбіл» фильмінде басты рөлдердің бірін сомдаған актриса Нұржан Бексұлтанова маусымның 29-ы мен шілденің 5-і аралығында Вьетнамда өткен 3rd Danang International Film Festival халықаралық кинофестивалінде «Үздік актриса» аталымын жеңіп алды, деп хабарлайды Orda.kz.

Бұл туралы «Әбіл» фильмінің режиссері Елзат Ескендір өз парақшасында былай деп жазды:

«Бір ай көлемінде екі бірдей актердің халықаралық фестивальдерден бірінен кейін бірі жеңімпаз жүлдесіне ие болуы — біз үшін зор қуаныш, күтпеген жаңалық», — дейді ол. 

Режиссер сондай-ақ Нұржан Бексұлтанованың табиғи болмысы мен кәсіби дарынын ерекше атап өтті:

«Осыдан 3 жыл бұрын Нұржан кастингке келіп, одан кейінгі бейне тест кезінде мен оған: «Сіз глянцке ұрынбаған, әзірге кино келбеті сақталған аз актердің бірісіз, толық қанды театрға жұтылып кетпеңіз» деген едім. Сол сөзімнің айғағындай Вьетнамдағы халықаралық қазылар алқасы да Нұржанның еңбегін жоғары бағалапты. Мен бек ризамын!». 

Нұржан Бексұлтанованың бұл жетістігі — қазақстандық кино үшін тағы бір үлкен мәртебе.

Еске сала кетсек, Елзат Ескендірдің «Әбіл» фильміндегі басты рөлді сомдаған Ерлан Төлеутай Қырғызстанда өткен III Халықаралық Бішкек кинофестивалінде «Ең үздік актер» жүлдесін жеңіп алған еді. Ал «Әбіл» фильмі болса Jury Grand Prize, Critical Jury Prize және NETPAC Prize атты марапаттарды ұтып алды. Азия киносын насихаттап, таратқаны үшін де бір жүлде алды. Сондай-ақ фильм Франциядағы кинофестивальде гран-приді жеңіп алды. 

Orda.kz тілшісі «Қазақфильм» аумағына кіре алмаған, халықаралық Азия кинофестивалінен үш бірдей жүлдемен оралған авторлық «Әбіл» фильмінің режиссері Елзат Ескендірге хабарласып, сұхбаттасқан еді. Ол «Қазақфильмге» қатысты шындықты, туып жатқан даудың неден шыққанын тарқатып айтып берді.