Ерлан Төлеутай Бішкектегі халықаралық кинофестивальде «Үздік актер» атанды

Қазақстандық актер Ерлан Төлеутай Қырғызстанда өткен III Халықаралық Бішкек кинофестивалінде «Ең үздік актер» жүлдесін жеңіп алды. Ол марапатты режиссер Елзат Ескендірдің «Әбіл» фильміндегі басты рөлі үшін иеленді, деп хабарлайды Orda.kz.

Марапатты фестиваль қазылар алқасының мүшесі, италиялық танымал кинопродюсер Паола Марина Спина табыстады.

Айта кетейік, «Әбіл» фильмі 2025 жылы ақпанда Францияда өткен 31-ші Vesoul халықаралық Азия кинофестивалінде де үш бірдей жүлдені еншілеген болатын: Қазылар алқасының бас жүлдесі, Киносыншылар жүлдесі және NETPAC қазылар марапаты.

Актер Ерлан Төлеутай мен режиссер Елзат Ескендірдің бұл табысы — қазақ өнерінің халықаралық деңгейде мойындалуының жарқын көрінісі болды.

Еске сала кетсек, белгілі режиссер Елзат Ескендір «Қазақфильм» аумағына кіре алмай жүргенін, бұл мәселенің түп-тамыры киностудия басшылығының қазақ тілді режиссерлерге деген көзқарасында жатқанын мәлімдеген еді. Ол тілшімізге берген сұхбатында осы «Әбіл» фильмін түсіргенде көрген қиындықтары мен мемлекеттен бөлінген қаржы жайлы ашық айтқан еді.