Нұрай Серікбайдың ісі: Сот алқабилерсіз өтуі мүмкін, жәбірленуші тарап тікелей эфир талап етті

Шымкентте 21 жастағы Нұрай Серікбайдың қазасына қатысты қылмыстық іс бойынша алдын ала сот отырысы өту керек еді. Алайда сотталушының денсаулығына байланысты негізгі сот талқылауы кейінге шегерілді, деп хабарлайды Orda.kz.

Сотталушы Шерхан Аймаханның қорғаушысы істі алқабилердің қатысуынсыз қарауды сұрады. 

Алдын ала тыңдауда сотталушы Шерхан Аймаханның адвокаты қылмыстық істі алқабилердің қатысуынсыз қарау туралы өтінішхат берді. 

Ал жәбірленуші тараптың адвокаты Аянхан Омаров сот процесінің барынша ашық өтуін сұрап, БАҚ өкілдеріне ақпарат таратуға және сот отырысын тікелей эфирде көрсетуге рұқсат беруді талап етті. Оның айтуынша, бұл іс қоғамда үлкен резонанс тудырған. 

Алайда сотталушының денсаулығына байланысты судья негізгі сот талқылауын кейінге қалдырды. Келесі отырыстың нақты күні әзірге белгіленген жоқ.

Еске сала кетейік, 2026 жылғы 11 қаңтарда Шымкентте 21 жастағы Нұрай Серікбай үйінен шыққан кезде оған күдікті шабуыл жасап, бірнеше рет пышақтаған. Қыз оқиға орнында көз жұмды. Күдікті екі күннен кейін ұсталды.

Шерхан Аймаханға Қылмыстық кодекстің 125-1-бабы («Некеге тұруға мәжбүрлеу»), 115-1-бабы («Сталкинг») және 99-баптың 2-бөлігі 5-тармағы («Аса қатыгездікпен адам өлтіру») бойынша айып тағылған.

Марқұмның жақындарының айтуынша, күдікті Нұрайды ұзақ уақыт бойы аңдып, қорқытып келген. Жәбірленуші полицияға бірнеше рет жүгінгенімен, тиісті шара қолданылмағанын мәлімдеген.

Оқиғадан кейін президент Қасым-Жомарт Тоқаев Шымкент қалалық полиция департаментінің әрекетін тексеруді тапсырған. Тексеру нәтижесінде департамент басшысы мен оның бірінші орынбасары қызметінен босатылды.

Оқи отырыңыз:

«11 жеріне пышақ сұққан»: Шымкентте кісі қолынан қаза тапқан қыздың денесі туыстарына берілді

Шымкентте Нұрайдың өлімі бойынша іс прокуратураға өтті, отбасы тергеу қорытындысымен келіспейді