Непал мен Қытайдағы алапат су тасқыны: Қазақстан азаматы жоғалған

Қазақстанның Сыртқы істер министрлігі Непал мен Қытайдағы жойқын су тасқыны салдарынан байланысқа шықпай қалған қазақстандық азамат туралы ақпаратты тексеріп жатыр, деп хабарлайды Orda.kz.       

Бұған дейін Қазақстан СІМ зардап шеккендер мен хабар-ошарсыз кеткендер арасында қазақстандықтар туралы мәлімет жоқ екенін хабарлаған еді. Алайда 27 тамызда жаңа ақпарат белгілі болды.

Алдын ала мәлімет бойынша, Қазақстан азаматы туристік топ құрамында Непалдан Қытай аумағына өткен. Қазір оның нақты қай жерде екені белгісіз. Оны іздеу жұмыстары жүргізіліп жатыр. Қазақстандық дипломаттар жергілікті мемлекеттік органдармен байланыста.

СІМ өкілдері жағдайды бақылауда ұстап отырғанын атап өтті.

Жойқын су тасқыны 26 тамызда Непалдың Қытаймен шекаралас Расува ауданында болды. Алдын ала мәлімет бойынша, Тибеттегі мұздықтың опырылуы тау өзендерінде алапат тасқын туғызып, көпірлерді, жолдарды және басқа да инфрақұрылым нысандарын шайып кеткен.

Табиғи апат салдарынан жүздеген адам қаза тауып, мыңнан астам адам хабар-ошарсыз кеткен. Олардың арасында шетелдік туристер де бар. Reuters мәліметінше, Непал мен Тибеттегі із-түзсіз жоғалғандардың арасында 33 елдің азаматтары бар.

Қазақстандық азаматтың қазіргі жағдайы әзірге белгісіз. Іздеу жұмыстары жалғасып жатыр.

Оқи отырыңыз:

• Көрінбейтін бүйрек саудасы: Ауған әйелдері балаларын осылай аштықтан сақтап отыр
• Құрылтай депутаттарына куәлік пен төсбелгі табысталды