Құрылтай депутаттарына куәлік пен төсбелгі табысталды

Қазақстан Республикасы Орталық сайлау комиссиясы Құрылтайдың 145 депутатын тіркеді. 27 тамыздан бастап олардың депутаттық өкілеттігі ресми түрде басталды. Бұл туралы ОСК-ның XVI отырысында мәлім болды, деп хабарлайды Orda.kz.       

Орталық сайлау комиссиясының төрағасы Нұрлан Әбдіров «Қазақстан Республикасының Құрылтайы және оның депутаттарының мәртебесі туралы» Конституциялық заңға сәйкес, депутаттың өкілеттігі Орталық сайлау комиссиясында тіркелген сәттен бастап басталатынын еске салды.

«Сіздердің өкілеттіктеріңіз Орталық сайлау комиссиясында тіркелген сәттен басталды. Енді сіздер – елдегі заң шығару билігін жүзеге асыратын жоғары өкілді орган – Қазақстан Республикасының Құрылтай депутаттарысыздар. Құрылтай депутаттары төте сайлау құқығы негізінде сайланды. Сайлау науқанының барлық кезеңі заңнама талаптарына қатаң сәйкес ұйымдастырылды. Депутаттық мандат – халықтың сенімі мен таңдауының нәтижесі. Ал Құрылтай депутаты мәртебесі әрқайсыңызға ел мен халық алдында үлкен жауапкершілік жүктейді»,—  деді Нұрлан Әбдіров.  

Отырыста жаңадан сайланған депутаттарға олардың депутаттық қызметін растайтын куәліктері мен арнайы төсбелгілері табысталды.

Еске салсақ, Қазақстанның саяси партиялары жаңа Парламент – Құрылтайдағы депутаттық мандаттарға ие болған кандидаттардың тізімін жариялады. Тиісті шешімдер партиялардың басқарушы органдарының отырыстарында қабылданды

Оқи отырыңыз:

• Президент партияларға Құрылтай депутаттары тізімін бекітуге 28 тамызға дейін уақыт берді
• Кім Құрылтай депутаты атанады? Партиялар кандидаттар тізімін жариялай бастады