Наурыз айындағы ҰБТ-ға қатысу үшін өтініштер 15 ақпаннан бастап қабылданады

Ғылым және жоғары білім министрлігі наурыз айында өтетін Ұлттық бірыңғай тестілеуге (ҰБТ) қатысу үшін өтініш қабылдау басталатынын жариялады, деп хабарлайды Orda.kz.      

Министрліктің мәліметінше, наурыз айындағы ҰБТ-ға қатысу үшін өтініштер 15 ақпаннан бастап 25 ақпанға дейін қабылданады.

Тіркелу Ұлттық тестілеу орталығының app.testcenter.kz ресми сайты арқылы немесе UTO мобильді қосымшасы арқылы жүзеге асады. Тестілеудің өзі 1 наурыз бен 6 сәуір аралығында өтеді.

Министрлік атап өткендей, наурыз айындағы ҰБТ-ға:

• күндізгі бөлімде ақылы негізде шартты түрде оқуға қабылданған студенттер;
• былтырғы мектеп түлектері мен колледж бітірушілер;
• Қазақстан Республикасының азаматтығы жоқ, бірақ қазақ ұлтының өкілдері;
• шетелде білім алған ҚР азаматтары;
• жоғары оқу орнына ақылы негізде түсуге ниетті бітіруші сынып оқушылары қатыса алады.
  
  

Өтініш беру кезінде тест тапсырушылар тестілеу өтетін орынды, күнін және уақытын өздері таңдайды.

2026 жылы ҰБТ форматы өзгеріссіз қалады. Тестілеу бұрынғыдай, талапкерлер үш міндетті пән және таңдау бойынша екі бейіндік пән тапсырады.

Тапсырмалардың жалпы саны — 120. Оның ішінде:

• «Қазақстан тарихы» пәнінен — 20 тапсырма;
• «Оқу сауаттылығы» мен «Математика» — 10 тапсырмадан;
• екі бейіндік пәннің әрқайсысынан — 40 тапсырмадан беріледі.
  
  

ҰБТ бойынша ең жоғары мүмкін балл — 140. Сондай-ақ биыл Ұлттық тестілеу орталығы талапкерлерге болашақ мамандықты таңдауға көмектесетін EDUNAVIGATOR.KZ кәсіби бағдарлау платформасын іске қосты. Бұл платформа мамандықты саналы түрде таңдауға ықпал етеді.

ҰБТ-ға дайындық сапасын арттыру мақсатында сынама тесттер іске қосылды. Оқу жылының басында Ұлттық тестілеу орталығының ресми сайтында талапкерлерге арналған көмекші материалдар жарияланды. 

Тестілеу уақыты — 4 сағат (240 минут). Ерекше білім беру қажеттіліктері бар балалар үшін қосымша 40 минут уақыт қарастырылған.

2026 жылғы қаңтар айындағы ҰБТ-ға шамамен 184 мың адам қатысқан. Тестілеуге қатысушылардың 75 пайызы қазақ тілінде, 25 пайызы орыс тілінде, ал 113 адам ағылшын тілінде тапсырған. Талапкерлердің 68 пайызы шекті балл жинаған. Бес пән бойынша орташа балл — 64. Ең жоғары нәтиже — 138 балл.

Оқи отырыңыз:

• Қаңтардағы ҰБТ басталды: Талапкерлердің 75%-ы тестілеуді қазақ тілінде тапсырады
• Елімізде 700-ден астам талапкер негізгі ҰБТ емтиханынан өтпеді
• «Әр бал үшін 7 мың теңге»: Ақтөбеде оқушыларға «ҰБТ-ны оңтайластырған» мұғалім сотталды