Науқас отадан кейін ішінде қалған дәкемен екі ай қиналып жүрген

Қызылорда облысында ота кезінде науқастың денесінде дәке қалып кетіп, оны екі айдан кейін басқа клиникада алдырған. Отадан кейін әбден жаны қиналып, зардап шеккен науқас сотқа беріп, өтемақы талап етті, деп хабарлайды Orda.kz.       

Қызылорда облысының тұрғыны хирургиялық операция кезінде денесінде дәке тампоны қалып қойғанын екі айдан кейін бірақ білген. Мұндай жағдай медицинада марлеома деп аталады.

Дәрігердің жіберген қателігінен науқас ұзақ уақыт бойы қатты ауырсынудан зардап шегіп, қанша емдесе де жазылмай қойған жарамен жүрген. Кейін оған қайтадан хирургиялық ота жасауға тура келген. Бұл ем-шараның ақысын ол өз қалтасынан төлеген.

Осыған байланысты азамат медициналық мекемеден материалдық шығынды өндіріп, моральдық зиянның өтемақысын төлеуді талап етті.

Сот анықтағандай, бастапқыда оған денесіндегі өспені (киста) алып тастау бойынша операция жасалған.

Алайда араға екі ай салып, ол басқа медициналық мекемеге жүгінуге мәжбүр болады. Сол жерде қайта ота жасалып, бұрынғы хирургиялық араласу кезінде қалып қойған дәке тампоны табылған.

Науқастың денесінде бөгде заттың болғаны ота хаттамасымен, медициналық құжаттармен, бейнежазбамен, сондай-ақ қайта ем жүргізген медициналық мекеме өкілінің түсініктемелерімен расталды.

Науқаста отадан кейін асқынулар болып, ұзақ уақыт жарасы жазылмаған, қабыну күшейіп, күн сайын таңу процедурасын жасау қажет болағн.  Бұның бәрі медициналық құжаттармен және емдеуші дәрігердің түсініктемелерімен дәлелденді.

Медициналық қызмет көрсету сапасын бақылауға уәкілетті орган жүргізген жоспардан тыс тексеру барысында медициналық көмек көрсету кезінде көптеген заңбұзушылық анықталды.

Атап айтқанда, операция кезінде міндетті медициналық стандарттар сақталмағаны, операциядан кейінгі бақылаудың тиісті деңгейде жүргізілмегені және медициналық құжаттардың талапқа сай толтырылмағаны анықталды. Күнделікті жазбалар толық жүргізілмеген, зерттеу нәтижелеріне клиникалық түсіндірме берілмеген. Сондай-ақ операция барысында алынған материалдарды зерттеу туралы мәліметтер де болмаған.

Сот ұсынылған дәлелдерді зерделей келе, жауапкердің кінәсі дәлелденді деген қорытындыға келіп, талап арызды қанағаттандырды.

Нәтижесінде медициналық мекемеден талапкердің пайдасына материалдық шығын мен моральдық зиянды өтеу үшін 1,5 млн теңгеден астам қаражат өндірілді.

Оқи отырыңыз:

• Жалған қажылық ұйымдастырып, жұрттан 60 млн теңге жинап алғандар сотталды
• Қайсар Қамза ісінің жай-жапсары: ҚМА тағы төрт күдіктінің аты-жөнін атады