«Миы шайқалып, ауруханаға түскен». Боксшы Теміртас Жүсіповтің әйелі күйеуімен татуласқанын айтты

Боксшы Теміртас Жүсіповтің әйелі миы ісініп, басынан жарақат алып, денесі көгерген күйде ауруханаға түскенін мәлімдеген болатын. Енді ол күйеуімен татуласқанын айтты, деп хабарлайды Orda.kz.

Әлем чемпионы Теміртас Жүсіповтің жұбайы отбасылық жанжалдан кейін күйеуімен татуласқанын мәлімдеді. Соған қарамастан, полиция қозғалған қылмыстық істің тергелуі жалғасатынын айтты.

Айта кетейік, Теміртас Жүсіпов — бокстан Қазақстанның сегіз дүркін чемпионы, Азия чемпионаттарының жеңімпазы және 2015 жылғы Бүкіләлемдік бокс сериясының (WSB) чемпионы.

Бұған дейін боксшыға әйелінің келісімінсіз онымен байланысуға тыйым салатын қорғау нұсқамасы шығарылған болатын. 7 шілдеде әйел полицияға арыз жазып, күйеуіне қатысты шара қолданбауды сұраған. Алайда, Ақмола облыстық полиция департаменті қылмыстық іс қозғалғанын және тергеу тоқтатылмайтынын хабарлады.

«Арыз берілгеніне қарамастан, отбасылық жанжал фактісі бойынша заң аясында тиісті шаралар қабылданады», — деп мәлімдеді ведомство өкілдері.

Бұған  дейін әлеуметтік желіде жәбірленушінің әпкесі спортшының әйелін көкала қойдай қылып ұрып тастағанын айтқан еді. Ал Жүсіпов отбасында қиындық барын мойындағанымен, әйелінің ауыр жарақат алғанын жоққа шығарды.

Оқи отырыңыз:

• Павлодарда жедел жәрдем 76 жастағы әйелді қағып кетті
• Талғат Алдыбергенов ҚТЖ басшысы қызметінен кетті