Министрлік көлік жүргізушілерге үндеу жасады

Қазақстанда мектеп оқушыларының жолдағы қауіпсіздігін арттыруға және балалардың құқықтарын қорғауға бағытталған «Балаларға назар аударыңыз!» акциясы басталды, деп хабарлайды Orda.kz ҚР ІІМ сілтеме жасап.      

Жаңа оқу жылының басталуына санаулы күндер қалуына байланысты полиция балалардың қауіпсіздігін қамтамасыз ету бойынша жұмыстарды күшейтті. Негізгі назар құқық бұзушылықтардың алдын алуға және балалардың жарақат алу қаупін азайтуға аударылып отыр. Іс-шараға мемлекеттік органдар мен әкімдіктердің өкілдері де қатысуда.

Оқу жылы қарсаңында мектептер мен басқа да білім беру ұйымдарының маңындағы бақылау күшейтіледі.

«Біздің басты міндетіміз – балалардың жолдағы қауіпсіздігін қамтамасыз ету. Жүргізушілер жылдамдық режимі мен жол қозғалысы ережелерін сақтаудың маңызын, ең бастысы, көлік тізгінінде мұқият болып, жолда балалардың күтпеген жерден пайда болуына дайын болу керектігін есте ұстауы тиіс. Бұл – балаларымыздың өмірін сақтаудың басты кепілі»,  деп атап өтті ІІМ. 

Сонымен қатар жаяу жүргіншілер өткелдерінің, жол белгілері мен жол таңбаларының жағдайы бақыланады. Мектеп автобустарының қауіпсіздігі және балаларды тасымалдау талаптарының сақталуы да тексеріледі.

Білім беру ұйымдарының жол инфрақұрылымын тексеру нәтижесінде 548 нұсқама берілгені атап өтілді.

«Ата-аналарға балаларға мектепте, көшеде, қоғамдық көлікте және интернетте қауіпсіз жүріс-тұрыс ережелерін еске салып отырудың қаншалықты маңызды екеніне назар аударғымыз келеді. Балалардың қауіпсіздігі – барлығымызға ортақ жауапкершілік. Қауіпсіз оқу жылын қамтамасыз етуге бәріміз жауаптымыз» деп толықтырды ІІМ. 

Бұған дейін жаңа оқу жылы басталар алдында Алматыда 300 мектеп автобусы тексеруден өткені хабарланған болатын.

Оқи отырыңыз:

• Жаңа оқу жылы: Қазақстанда қандай өзгерістер болады?
• Әуежайда бет-жүзбен 15 секундта тексеру: Қазақстанда жолаушылар үшін не өзгереді?