«Алаяқтардан алданып, қарызға батқан»: Курьер-ананың жағдайы айтылды

Төрт айлық баласын көтеріп курьер болып жүрген алматылық келіншектің оқиғасы қоғамда қызу талқыға түсті. Отбасының баспанадан бастап денсаулыққа дейінгі мәселелермен бетпе-бет қалғаны белгілі болды, деп хабарлайды Orda.kz.

Алматы көшелерінде төрт айлық сәбиін көтеріп тапсырыс тасыған 20 жастағы келіншектің оқиғасы қоғам назарын аударды. Жас ананы тауып, мән-жайды білген Алмат Несіпқалиев бұл отбасының қандай ауыр қиындыққа тап болғанын толық баяндап берді. Ол әзірге ешқандай қаражат жинау басталмағанын айтып, жұртты алаяқтардан сақ болуға шақырды.

Ерлі-зайыпты қазір бір бөлмелі жер үйде жалдап тұрады. Келіншектің көше кезіп жұмыс істеуінің басты себебі – олар пәтер мәселесі бойынша алаяқтарға алданып, қатты қарызға батқан. Дәл сол күні олар пәтерақы төлеуі тиіс болған. Мемлекеттен берілетін 25 мың теңге жәрдемақы ішіп-жемнен артылмайды. Оған қоса мойындарында несиелері мен ломбардқа өткізген заттарының өсімпұлы бар. Ал курьерлік қызметтегі бір тапсырыс үшін небәрі 500-600 теңге ғана төленеді.

Отағасының да жағдайы мүшкіл. Ол жалдамалы көлікпен такси қызметінде істейді. Жақында денсаулығы күрт нашарлап, шұғыл ота жасау қажет болған. Алайда ақшаның жоқтығынан оны кейінге қалдырған. Амалсыздан күйеуі ауырсынуды басатын дәрі ішіп жұмысқа шықса, әйелі кішкентай сәбиімен курьер болуға мәжбүр болған.

Оқи отырыңыз:

• «Бұл – отбасылық мәселе»: Министрлік сәбиін қолына ұстап курьер болып жүрген анаға қатысты пікір білдіруден бас тартты
• Қазнет іздеген курьер-ана табылды
• Әл-Фарабидегі жол апаты: Zeekr жүргізушісінен неге әлі жауап алынбады?