Министр тарап кеткен жеке деректерге қатысты пікір білдірді

Жасанды интеллект және цифрлық даму вице-министрі Ростислав Коняшкин ҚР азаматтарының жеке деректері қалайша алаяқтардың қолына түскені туралы сұраққа жауап берді, деп хабарлайды Orda.kz.

Оның сөзінше, істің мән-жайын бірден анықтау мүмкін емес. 

«Әзірге тергеу амалдары жүріп жатыр, сондықтан біз ақпарат бере алмаймыз. Тергеу нәтижесі бойынша, алдағы уақытта ақпарат жариялаймыз деген ойдамын. Қазір мен сіздерге ештеңені дөп басып айта алмаймын», – деді вице-министр Ростислав Коняшкин. 

Сондай-ақ, тілшілер одан неліктен қорғаныс механизмі азаматтардың жеке мәліметтерін қорғай алмағаны жайлы және оған мемлекеттік органда істейтін тұлғалардың қатысы бар, жоғын сұрады. Оған жауап ретінде вице-министр алдын ала шешім шығарып, ХҚКО немесе басқа мекеменің жұмыскерлеріне айып тағып қажет емес екенін, жеке мәліметтерді таратудың түрлі жолы барын айтты.

«Жеке мәліметтерді алу заңсыз сайттар сілтемесі, QR кодтар немесе қоңыраулар арқылы да болуы мүмкін. Сондай-ақ, бұған дейін микроқаржы ұйымдары мен жеке ақпараттық жүйелер арқылы да бұндай жағдайлар болған», – деді Ростислав Коняшкин. 

Айта кетейік, бұған дейін ҰҚК ҚР азаматтардың жеке деректерін сатумен айналысқан ұйымды анықтаған болатын.

Оқи отырыңыз:

• Алматыда алаяқтық мақсатымен 4 млн қоңырау шалған қылмыстық топ ұсталды
• Елімізде балалардың атына жеке кәсіпкерлік рәсімдеуге болады
• Павлодарда кәсіпкердің өліміне 84 миллион теңге қарыз себеп болған