Михаил Шайдоров ISU сыйлығына үміткер атанды

10 наурыз 2026 12:43 Ләззат Сұңқар

Мәнерлеп сырғанаудан Милан–Кортина Олимпиадасының чемпионы Михаил Шайдоров халықаралық ISU Skating Awards сыйлығына үміткер ретінде ұсынылды, деп хабарлайды Orda.kz.

Қазақстандық мәнерлеп сырғанаушы Михаил Шайдоров беделді ISU Figure Skating Awards 2026 сыйлығының үміткерлері тізіміне енді. International Skating Union спортшыны «Ең үздік костюм» аталымына қосты.

Бұл аталым 2025/2026 жылғы маусымда алғаш рет көрсетілген, креативтілігімен, стилімен, сәнімен және өзіндік ерекшелігімен көзге түскен костюм үшін жеке мәнерлеп сырғанаушыға, спорттық жұпқа немесе би дуэтіне беріледі.

Шайдоров Олимпиадада киген костюмді дизайнерлер Сәенг Жақсыбаев пен Aқмарал Жарасқызы дайындаған. Дәл осы қара-көк түсті, жылтыр элементтері бар костюммен спортшы Италияда өткен 2026 жылғы Олимпиада ойындарында еркін бағдарламасын орындаған.

Үміткерлерге дауыс беру 18 наурызға дейін жалғасады. Осыдан кейін сарапшылар қысқа тізімнен жеңімпаздарды анықтайды. Сыйлықтың қорытындысы 29 наурызда Прага қаласында өтетін Мәнерлеп сырғанаудан әлем чемпионаты кезінде жарияланады. Салтанатты рәсімді Skating ISU YouTube арнасынан тікелей эфирде көруге болады.

Айта кетейік, ISU Figure Skating Awards жыл сайын өткізіледі. Бұл марапат аясында тек спортшылар ғана емес, сонымен қатар жаттықтырушылар, хореографтар және костюм дизайнерлері де атап өтіледі.

Михаил Шайдоров — «Ең үздік костюм» аталымы бойынша бұл сыйлыққа ұсынылған Қазақстандағы алғашқы мәнерлеп сырғанаушы.

Еске салайық, алматылық спортшы Олимпиада — 2026 ойындарында ерлер арасындағы жеке сайыста алтын медаль жеңіп алып, Олимпиада чемпионы атанды. Бұл Қазақстан тәуелсіздік жылдарындағы мәнерлеп сырғанаудан алынған алғашқы олимпиадалық алтын медаль.

Қазақстандық мәнерлеп сырғанаушы Михаил Шайдоров Олимпиада-2026 ойындарында еркін бағдарламада өнер көрсеткенде киген костюмін Олимпиада музейіне табыстады.

Оқи отырыңыз:

Жаңалықтар

барлық жаңалықтар