Ми-8 тікұшағы апаты: БҚО-да төрт адамның қазасына себеп болған іс сотқа жетті

Батыс Қазақстан облысында Ми-8 тікұшағының апатқа ұшырағанына үш жарым жыл өтсе де тергеу тоқтамай, қылмыстық іс ақыры сотқа жолданды. Сол кезде осы оқиға салдарынан төрт адам қаза тапқан болатын, деп хабарлайды Orda.kz.       

Ми-8 тікұшағының апатқа ұшырауына қатысты қылмыстық істі Батыс Қазақстан облысы Бәйтерек ауданының №2 соты қарап жатыр. Сот отырыстары Қазақстан Республикасы Қылмыстық кодексінің 344-бабы бойынша өтуде.

Еске салайық, 2023 жылғы 23 ақпанда «Қазавиақұтқару» тікұшағы Батыс Қазақстан облысында апатты жағдайда қонған. Қазақстанның азаматтық авиация саласындағы уәкілетті органы тікұшақтың «ҚазТрансОйл» АҚ-ның тапсырысы бойынша құбырды әуеден тексеру жұмыстарын жүргізгенін хабарлаған.

Алғашқы ақпаратта оқиға салдарынан адам қаза болмағаны, бірнеше адамның зардап шеккені айтылған. Алайда кейін тікұшақтың апатты жағдайда қонуы кезінде төрт адамның қаза тапқаны, тағы екі адамның жарақат алғаны белгілі болды.

Қазақстан Төтенше жағдайлар министрлігінің мәліметінше, тікұшақ бортында алты адам болған. Оның бесеуі экипаж мүшесі, біреуі «ҚазТрансОйл» АҚ-ның өкілі еді. Министрлік апат салдарынан «Қазавиақұтқару» қызметкерлерінің қаза тапқанын хабарлаған. Сондай-ақ ведомство зардап шеккендерді құтқару сәтінің бейнежазбасын жариялаған.

Оқиғаны сол кезде ҚР Индустрия және инфрақұрылымдық даму министрлігінің Көліктегі оқиғалар мен инциденттерді тергеп-тексеру департаменті зерттеген.

Тергеу Қазақстан Республикасы Бас көлік прокуратурасының қадағалауымен жүргізілген.

Оқи отырыңыз:

• Жаһандық экологияға қауіп: Оман мен Иран жағалауындағы мұнай төгінділері
• Қарағанды облысында табиғи өртті сөндіру жұмыстары жалғасуда