Қарағанды облысында табиғи өртті сөндіру жұмыстары жалғасуда

Қарағанды облысының екі ауданында өрт сөндірушілер табиғи өрттерді толықтай сөндірді, бір ауданда өрт оқшауланды. Кейбір аумақтарда өрт сөндіру жұмыстары әлі де жалғасып жатыр, деп хабарлайды Orda.kz Төтенше жағдайлар министрлігінің баспасөз қызметіне сілтеп.

Бұқар жырау ауданындағы Сұйықсу, Шет ауданындағы Ақбауыр, Қарқаралы ауданындағы Бесоба және Жаңатоғай ауылдарында тұтанған өрт сөндірілді. Қарқаралы ауданындағы Ынталы ауылында өрт оқшауланды.

«Қазіргі уақытта Ақтоғай ауданындағы Ақши ауылының маңындағы жекелеген ошақтарды, сондай-ақ Қызылтау тауларының таулы әрі жетуі қиын аумағындағы өрт сөндіру жұмыстары жалғасып жатыр. Күрделі жер бедері мен қатты екпінді жел жұмыстарды қиындатып, оттың таралуына ықпал етуде»,  деп хабарлады Төтенше жағдайлар министрлігі. 

Аумақты тексеру үшін әуеден барлау жүргізілді. Жету қиын жекелеген учаскелерге қосымша күштер мен қажетті техника жеткізілді. Министрлік мәліметінше, елді мекендерге, қыстауларға және егістік алқаптарға өрттің таралу қаупі жоқ.

«Жекелеген учаскелерде су шашып, өртті толық сөндіру жұмыстары жүргізілуде. Оттың таралуына жол бермеу және қалған ошақтарды жою бойынша шаралар қабылданып жатыр»,  деп нақтылады ведомство. 

Өртті сөндіру жұмыстарына Төтенше жағдайлар министрлігі мен жергілікті атқарушы органдардан 200-ге жуық адам және 60 техника жұмылдырылған.

Жағдай Төтенше жағдайлар министрлігінің бақылауында. Қажетті шаралардың барлығы тәулік бойы жүргізіліп жатыр.

Оқи отырыңыз:

• Үкімет Қашағанның 10,7 млрд долларлық келісімшарты бойынша жемқорлық болғанын мәлімдеді
• Иран Трамптың Ормуз бұғазын АҚШ-тікі деп жариялау жоспарына жауап берді