«Мені көздеген болуы мүмкін» — Трамп өзі қатысқан іс-шарадағы атыс туралы мәлімдеме жасады

Трамп өзінің қатысуымен өткен Ақ үй тілшілері қауымдастығының кешкі асында болған атысқа қатысты мәлімдеме жасады. АҚШ президенті Дональд Трамп өзі қатысқан салтанатты кеште оқ атқан адамның негізгі нысанасы өзі болуы мүмкін екенін жоққа шығармады, деп хабарлайды Orda.kz.      

«Мен болып жатқан жағдайды бақылап тұрдым. Бәлкім, одан да тезірек кету керек еді. <...> Бір жағынан, бірнеше қарумен бақылау-өткізу пунктіне ұмтылған адамның қалай залалсыздандырылғанын көру де – әсерлі көрініс, мұны Құпия қызметтің өте батыл қызметкерлері орындады», – деді ол баспасөз конференциясында

Қылмыскердің ықтимал себептеріне қатысты Трамп бұл оқиға АҚШ-тың Ирандағы операциясымен байланысты болуы екіталай екенін айтты.

«Олай деп ойламаймын, бірақ ешқашан нақты білмейсің», – деп жауап берді ол.

Еске салсақ, сенбі күні кешке қарулы адам Washington Hilton қонақүйіндегі Ақ үй тілшілерімен өткен салтанатты кеш залына басып кіріп оқ атты.  Ол қолындағы қарумен Құпия қызмет агентін жаралап үлгерген, кейін ұсталды.

New York Post басылымының мәліметінше, шабуылды Калифорниядан келген 31 жастағы мұғалім Коул Томас Аллан жасаған. Ол ауруханаға жеткізілді және ертең сот алдында жауап береді.

Ал CBS телеарнасы екі дереккөзге сілтеме жасап хабарлағандай, күдікті құқық қорғау органдарына Трамп әкімшілігінің шенеуніктеріне оқ атқысы келгенін айтқан.

Оқи отырыңыз:

• Трамп қатысқан Ақ үй тілшілері қауымдастығының кешкі асында атыс болды
• Трамп ирандықтармен кездесу барысында тағы құбылып, делегация жібермейтін болды
• Макрон Еуропаны «оянуға» шақырып, Ресей, Қытай мен АҚШ қарсылығын еске салды