Тәрбиеші ұрған баланың ата-анасы арыз жазудан бас тартқан

Тәрбиеші баланы дұрыс орындамаған тапсырмасы үшін ұрып-соққан. Бүлдіршіннің ата-анасы арыз жазудан бас тартқан, деп хабарлайды Orda.kz.

Бейнебақылауға жазылып қалған бұл жағдайды баланың анасы әлеуметтік желіде жариялады. Видеодан баллардың екі ересек адамның бақылауымен тапсырма орындап отырғанын байқау қиын емес. Олардың бірі ашуға бой алдырып, баланың дәптерін қайта-қайта түртіп, қолы мен иығынан ұрған. Баланың анасы келеңсіз оқиғаға қатысты өз пікірін білдірді.

«Балабақшада жағдай мені қатты алаңдатты. Тәрбиеші балама қол көтерген. Ата-ана ретінде бұл мен үшін мүлде қабылдауға болмайтын, қорқынышты жағдай. Балалар қауіпсіз ортада болып, қамқорлық пен қолдауды сезінуі керек. Мұндай жайттар назардан тыс қалмауы керек», – деді ол. 

Қалалық білім бөлімі аталған дерек бойынша жедел тексеру жұмыстарын бастады. 

«Оқиғаның мән-жайын жан-жақты, объективті әрі толық анықтау мақсатында қызметтік тексеріс жүргізілуде. Тергеу барысында қажетті шаралар қабылданды. Тексеру қорытындысы бойынша қолданыстағы заңнамаға сәйкес тиісті шешім қабылданады» деп жазылған хабарламада.

Баланы ұрып-соққан 36 жастағы балабақша тәрбиешісі полиция бөлімшесіне жеткізілді. Құқық қорғау органдары қос тарап, яғни видеоны жариялаған ана мен тәрбиешіні кездестірген. 

«Полиция бөлімшесінде баланың анасы арыз жазудан бас тартса да, тәртіп сақшылары бұл деректі назардан тыс қалдырмады. Аталған дерек бойынша қылмыстық іс қозғалды. Қазіргі уақытта оқиғаға қатысты тергеу амалдары жүргізіліп жатыр», деп хабарлады полиция департаментінің баспасөз қызметі.

Оқи отырыңыз: 

• Бұрынғы қазақстандық, қазір Германиядағы блогер Шаханов пен қазақ елін қорлады
• Трамп қатысқан кездесудегі атыс: Шабуыл туралы не белгілі?