Мемлекеттік қызметте 18 қылмыстық іс тіркеліп, жол сапасына қатысты 77 шенеунік жазаланды

Павлодар облысында мемлекеттік қызметшілерге қатысты 18 қылмыстық іс тіркелді. Құқықбұзушылықтардың басым бөлігі тұрғын үй-коммуналдық шаруашылық және құрылыс, салық саласы, сондай-ақ ауыл шаруашылығы бағыттарына тиесілі, деп хабарлайды Orda.kz.       

Өңірде мемлекеттік қызметте 4000-нан астам адам жұмыс істейді. ҚР ҰҚК Павлодар облысы бойынша департаментінің мәліметінше, 2025 жылы аймақта 14 қылмыстық іс тіркелсе, биылғы жылдың басынан бері тағы төртеуі қосылған.

«2025 жылы қылмыстық жауапкершілікке жеті адам тартылса, осы жылдың басынан бері бір адам тартылды. Атап айтқанда, үш адамнан тұрғын үй-коммуналдық шаруашылық және құрылыс салаларында, екі адамнан салық саласында, екі адамнан ауыл шаруашылығы саласында істер қаралуда. Сонымен қатар ветеринария, жер қатынастары, қаржы, мемлекеттік қызмет көрсету, білім беру, спорт, көліктік бақылау және цифрлық технологиялар салалары бойынша бір-бір адамнан жауапкершілікке тартылған», деп хабарлады өңірлік ҰҚК департаменті. 

Еске салайық, бұған дейін Павлодарда мемлекеттік сатып алу заңнамасын бұзғаны үшін шенеуніктер жазаланғаны хабарланған болатын.

Сонымен қатар Батыс Қазақстан облысындажолдарды күтіп-ұстау сапасының төмендігі үшін 77 шенеунік жазаланды.

Батыс Қазақстан облысында биылғы жылдың үш айында өңірдегі автомобиль жолдарына 744 тексеру жүргізіліп, олардың қорытындысы бойынша дәл осындай мөлшерде нұсқама берілген.

Батыс Қазақстан облысы полиция департаментінің баспасөз қызметінің мәліметінше, республикалық маңызы бар жолдарда 145 тексеру жүргізіліп (7 хаттама толтырылған), облыстық және аудандық жолдарда — 263 (31 хаттама), елді мекен ішіндегі жолдарда — 335 (39 хаттама), шаруашылық жолдарында бір тексеру жүргізілген.

«Автомобиль жолдары мен жол құрылыстарын, сондай-ақ жол қозғалысын ұйымдастырудың техникалық құралдарын тиісті деңгейде күтіп ұстамағаны және нұсқамаларды орындамағаны үшін 77 лауазымды тұлға әкімшілік жауапкершілікке тартылды, оның ішінде 49-ы — бірінші деңгейдегі басшылар. Оның ішінде жолдарды тиісті деңгейде ұстамағаны үшін 72 лауазымды тұлға жауапкершілікке тартылып, олардың 44-і бірінші деңгейдегі басшылар болды. Қалған бес бірінші деңгейдегі басшы Қазақстан Республикасының Әкімшілік құқықбұзушылық туралы кодексінің 462-бабы 3-бөлігіне сәйкес бес нұсқаманы орындамағаны немесе толық орындамағаны үшін айыппұл салынды», деп хабарлады ведомство. 

Департамент мәліметінше, өткен жылы шамамен 2000 тексеру қорытындысы бойынша 283 лауазымды тұлға жауапкершілікке тартылған, оның ішінде 161-і — бірінші деңгейдегі басшылар.

Осы тексерулер нәтижесінде өткен жылы жолдарда бағдаршамдар орнату, жол белгілерін қою, жол таңбаларын сызу және жарықтандыруды қамтамасыз ету жұмыстары жүргізілген.

Оқи отырыңыз:

• ІІМ жылдамдыққа қатысты «жаңа айыппұл» туралы ақпаратқа жауап берді
• Әзілхан Нұршайықов пен Мәншүк Мәметова: Майдан даласында тоғысқан тағдырлар
• Депутаттық әдеп мәселесі алғаш рет конституциялық деңгейде бекітіледі