Депутаттық әдеп мәселесі алғаш рет конституциялық деңгейде бекітіледі

Қазақстанда алғаш рет депутаттық әдепке қатысты мәселелерді Конституциялық заң деңгейінде бекіту ұсынылып отыр. Бұл туралы мәжіліс депутаты Айдос Сарым мәлімдеді, деп хабарлайды  Orda.kz.       

Бұл жөнінде оған мәжілістің тағы бір депутаты Асхат Рақымжанов түсініктеме беруді сұрап жүгінген. Оның айтуынша, Қазақстан Республикасының Құрылтайы туралы конституциялық заң жобасындағы маңызды жаңалықтардың бірі — депутаттық әдеп жөніндегі кеңес құру болмақ. 

Рақымжанов бұл кеңестің жұмыс тәртібі қандай болатыны, оның құрамына кімдер кіретіні және депутаттық әдеп кодексін жеке қабылдау қажет пе деген сұрау қойған.

«Біз алғаш рет депутаттық әдеп мәселесін Конституциялық заң деңгейіне көтеріп отырмыз. Бұл жаңа саяси және парламенттік мәдениетті қалыптастыратын өте маңызды институт», — деп түсіндірді Айдос Сарым. 

Оның айтуынша, мәжілістегі әдеп комиссиясы қазіргі шақырылымда жұмысын бастаған.

«Жасыратыны жоқ, көптеген әріптестеріміз әдеп комиссиясының қарауында болып үлгерді. Қазіргі нұсқада бұл комиссия төрағадан және әр депутаттық фракциядан палата сайлайтын мүшелерден құралған. Болашақта осы тәртіпті регламентте сақтауға болады деп ойлаймын. Барлық мәселелерді жаңа Құрылтайдың регламентінде жан-жақты нақтылап жазу қажет», — деді Сарым. 

Еске салсақ, «Құрылтай және оның депутаттарының мәртебесі туралы» Конституциялық заңда депутаттық этикаға арнайы тарау арналған. Құжатта депутат мінез-құлқы ресми отырыста ғана емес, жұмыс бабындағы кез келген әрекетте саяси мәдениет пен заң талабына сай болуы керек екені көрсетілген.      

Құрылтай депутаттарына қатысты жаңа этика ережесі олардың дауыс беріп, заң қабылдауына жол ашып қана қоймай, ендігі жерде қалай сөйлеп, қалай пікір таластыратынын да қатаң реттейтін болады.

Оқи отырыңыз:

• Құрылтай депутаттары ақырын басып, анық айтатын болды
• Нұрлыбек Нәлібаев Қазақстан Республикасы премьер-министрінің бірінші орынбасары болып тағайындалды
• Парламент сайлауы референдумнан да қымбатқа түсуі мүмкін