Мемлекеттік қызметшілер 2027 жылдан бастап жеке мүдделері туралы декларация тапсырады

2027 жылдан бастап Қазақстанда бірқатар мемлекеттік қызметшілер жеке мүдделері туралы декларация тапсыруға міндеттеледі. Тиісті талап Қазақстан Республикасы Үкіметінің қаулысымен бекітілді, деп хабарлайды Orda.kz.

Декларацияны жауапты мемлекеттік лауазымды атқаратын тұлғалар, мемлекеттік функцияларды орындауға уәкілетті тұлғалар, лауазымды тұлғалар және оларға теңестірілген тұлғалар мемлекеттік қызметке қабылданған күннен бастап 15 жұмыс күні ішінде тапсыруы керек.

Құжатта мемлекеттік қызметшінің:

• жақын туыстары, жұбайы, жекжаттары және онымен бір мемлекеттік органда, ұйымда немесе квазимемлекеттік сектор субъектісінде жұмыс істейтін басқа да байланысты тұлғалары;
• педагогикалық, ғылыми, шығармашылық және өзге де ақылы қызметі;
• коммерциялық ұйымдар мен жеке кәсіпкерлікке қатысуы, оның ішінде қазіргі лауазымына тағайындалғанға дейінгі бір жыл ішіндегі қатысуы;
• меншігіндегі немесе өзге де заттық құқық негізінде тиесілі мүлікті сенімгерлік басқаруға беруі туралы мәліметтер көрсетіледі.

Декларация белгіленген нысан бойынша жазбаша түрде толтырылып, кадр қызметіне тапсырылады. Кейін ол мемлекеттік қызметшінің жеке ісіне тіркеледі.

Бұл талап Қазақстан Республикасы Үкіметінің 2026 жылғы 20 тамыздағы №746 қаулысымен енгізілді. Қаулы 2027 жылғы 1 қаңтардан бастап күшіне енеді.

Оқи отырыңыз:

• 3600 метр биіктікте адасқан үш турист құтқарылды
• Семей полигонының жабылғанына 35 жыл: Қасіреттен қарусыздануға дейін