Мектеп оқушыларының төбелесінен қыршын өмірлер қиылып жатыр

Қызылорда облысында тоғызыншы сынып оқушысының өліміне күдікті ретінде тағы бір оқушы айыпталды. Кәмелетке толмаған баланы аяусыз соққыға жығып, салдарынан ол қайтыс болды деген күдікпен Қызылорда облысындағы 17 жастағы жасөспірім қамауға алынды, деп хабарлайды Orda.kz.

Полиция оқиғаға қатысты сотқа дейінгі тергеуді бастады. Іске қатысты тағы екі адам бар, олардың жасы хабарланбады.

«Біз қажетті тергеу әрекеттерін жүргізіп жатырмыз, оның ішінде барлық материалдардар зерделенуде. Күдікті уақытша ұстау изоляторына қамалды. Осы қылмысқа қатысы бар қалған екеуінің үстінен бұзақылық жасағаны үшін қылмыстық іс қозғалып, сот оларға қатысты үйқамаққа алу түріндегі бұлтартпау шарасын таңдады» деп жазылған облыстық полиция департаментінің хабарламасында.

Полицейлер оқиға туралы облыстық білім басқармасына хабарлаған.

Басқарма Қылмыстық іс жүргізу кодексінің 201-бабына сілтеме жасап, басқа ақпарат бермеді.

Өткен жылы төбелес пен жанжал кезінде жасөспірімдер қаза тапқан бірнеше жағдай болды.

Осылайша, өткен жылдың мамыр айында Жамбыл облысында көшедегі әжетханада жоғары сынып оқушылары соққыға жыққан ауыл оқушысы қайтыс болды.

Сол айда Жамбыл ауданы Сарымолдаев ауылында бір топ қатарласы 16 жасар жасөспірімді өлтірген болатын. Оқушы басынан жез тұмсықпен (кастет) жарақат алып, оқиға орнында көз жұмды.

2024 жылдың ақпан айында Қызылорда облысы Белкөл ауылында жасөспірімдер арасында жанжал болған. Біреуі екіншісінің кеуде тұсынан екі рет ұрған кезде 13 жасар бала қайтыс болды. Осы оқидан кейін жергілікті мектептің оныншы сынып оқушысы алты жыл сегіз айға бас бостандығынан айырылды.

 Бұған дейін Көкшетаудағы № 6 мектеп-лицейде әжетханаларға бейнебақылау камералары орнатылып, бұл жайт ата-аналар арасында  қызу талқыға түскен болатын.

Сол сияқты Ақтөбедегі Қопа ауылындағы оқушы қайтыс болған мектепте әлімжеттік пен бопсалау өршіп тұрғанын жаздық. Бұл туралы бала құқықтары жөніндегі уәкіл Динара Зәкиева мәлімдеген еді.

 Сондай-ақ полиция 2023 жылы  балаларға қатысты зорлық-зомбылық бойынша 851 оқиға бойынша 660 адам қылмыстық жауапкершілікке тартылғанын, оның 392-сі сотталғанын, қалғандары бойынша тергеу мен сот процестері жүріп жатқанын айтқан еді.

Павлодар облысында мектеп жасындағы бала өзі құралыптас екі мектеп оқушысына пышақ сұғып алып,  полиция оқиға бойынша қылмыстық іс қозғаған.

 Қызылорда облысы Белкөл кенті орта мектебінің оқушылары тұрғын үйлердің бірінің кіреберісіне жиналып, өзара жанжалдасып,   кеуде тұсынан екі рет алған жұдырықтан  оқиға орнында кәмелетке толмаған оқушының көз жұмғанын да жазған едік. 

Осындай соңғы кезде белең алған оқушылар арасындағы және мектепішілік төбелестерден бір-бір шаңырақтың үміт артар ұлдары қыршынынан қиылып жатқаны - қоғамдағы тәртіптің таразысы ретінде қаралатын кез келді.