Ақтөбедегі оқушы қайтыс болған мектепте әлімжеттік пен бопсалау өршіп тұр

Ақтөбедегі Қопа ауылындағы оқушы қайтыс болған мектепте әлімжеттік пен бопсалау өршіп тұр. Бұл туралы бала құқықтары жөніндегі уәкіл Динара Зәкиева мәлімдеді, деп хабарлайды Orda.kz.

Бала құқықтары жөніндегі омбудсмен өзінің әлеуметтік желідегі парақшасында Қопа ауылындағы мектепке барып, психолог, әлеуметтік қызметкер және кәмелетке толмағандар ісі жөніндегі инспектордың жұмысын зерттегенін хабарлады.

Оқушылар арасында жүргізілген жасырын сауалнама нәтижесінде Динара Зәкиева мектепте шұғыл араласуды талап ететін тәртіпсіздіктердің бар екенін анықтады.

«Мектепте балалар арасында "жүйе" бар, мұнда үлкендер кішілерді "тәрбиелеп", бопсалау және басқа да мәселелер байқалады», — деді омбудсмен.

Бұл жайлы ол аудан әкіміне, мектеп қызметкерлеріне және жергілікті полицияға хабарлағанымен, олар бұл проблемалардың бар екенін мойындағысы келмеді.

«Өкінішке қарай, буллинг пен кәмелетке толмағандар арасындағы қылмыс барлық өңірде өзекті болып тұр. Бұл алдын алу шараларын талап етеді. Осыған байланысты балалардың құқықтарын қорғау мен құқық бұзушылықтардың алдын алу жүйесін қалыптастыру үшін шешілуі тиіс бірнеше маңызды мәселелер бар. Қазіргі уақытта біз бұл бағытта ҚР Президент Әкімшілігімен және мемлекеттік органдармен жұмыс істеп жатырмыз», — деді Динара Зәкиева.

Еске салайық, Orda.kz 4 қыркүйекте Ақтөбе облысы Қопа ауылында болған төбелес кезінде 9-сынып оқушысы қаза тапқаны жайлы жазған болатын. Артынша үш жасөспірім ұсталған еді.