Мас болып екі көлікпен соқтығысқан Данияр Елеусінов 20 тәулікке қамалды

Астанада полицейлер екі жол-көлік оқиғасына қатысқан Toyota Land Cruiser автокөлігінің жүргізушісін ұстады. Полиция рөлде бокстан Олимпиада чемпионы Данияр Елеусінов болғанын растады, деп хабарлайды Orda.kz.       

Астана қалалық полиция департаментінің баспасөз қызметінің хабарлауынша, қалада бірнеше автокөлік зақымданған екі жол апаты болған.

Алдын ала мәлімет бойынша, Toyota Land Cruiser көлігінің жүргізушісі басқа көліктермен соқтығысып, кейін оқиға орнынан кетіп қалған

Астана қаласының мамандандырылған ауданаралық әкімшілік құқық бұзушылықтар жөніндегі сотында азамат Е.-ге қатысты әкімшілік құқық бұзушылық туралы іс қаралды (ӘҚБтК-нің 608-бабы 3-бөлігі).

Сотта анықталғандай, азамат Е. алкогольдік масаң кезінде автокөлік басқарып, Астана қаласы көшесіндегі қозғалыс кезінде 3 жол-көлік оқиғасын (ЖКО) жасаған.

Жол-көлік оқиғалары салдарынан көлік құралдарына механикалық зақым келіп, материалдық шығын келтірілген.

Құқық бұзушының кінәсі іс материалдарымен дәлелденген, оның ішінде медициналық куәландыру қорытындысына сәйкес Е.-нің жеңіл дәрежедегі алкогольдік масаң болғаны анықталған.

Сондай-ақ әкімшілік құқық бұзушылық туралы хаттамалар, жол-көлік оқиғаларының сызбалары, бейнежазбалар, қатысушылардың түсініктемелері және сотта зерттелген өзге де дәлелдермен расталған.

Е.-нің әрекеті ӘҚБтК-нің 608-бабы 3-бөлігі бойынша сараланған.

Аталған баптың санкциясы 20 тәулікке әкімшілік қамауды және 7 жыл мерзімге көлік құралын басқару құқығынан айыруды көздейді.

Сот отырысында Е. өз кінәсін толық мойындады. ӘҚБтК-нің 50-бабы 2-бөлігінде көзделген әкімшілік қамауды қолдануға кедергі келтіретін мән-жайлар сотта анықталған жоқ.

ӘҚБтК-нің 608-бабы 3-бөлігі санкциясының баламасыз болуына байланысты сот Е.-ге 20 тәулікке әкімшілік қамау және 7 жыл мерзімге көлік құралын басқару құқығынан айыру түріндегі жаза тағайындады.

Қаулы әзірге заңды күшіне енген жоқ.

Бұған дейін бокстан Олимпиада чемпионы Данияр Елеусіновке қатысты әкімшілік іс сотқа түскенін жазған болатынбыз. Сот базасының мәліметі бойынша, Астанада болған екі ЖКО-дан кейін және апат болған жерден кетіп қалған спортшыға бірден үш әкімшілік хаттама толтырылған.

Оқи отырыңыз:

• Данияр Елеусінов Астанада екі жол апатына қатысы бар деген күдікпен ұсталды
• Түркістан полициясы журналистің ұрланған көлігін бірнеше сағат ішінде тауып берді
• Алматы облысында 2025 жылы жоғалып кеткен әйелдің денесі табылды