Маңғыстауда жауған нөсер мен дауылдан жүздеген жылқы қырылды, ұсақ мал да бар

Маңғыстау облысының Маңғыстау ауданында нөсер жаңбыр мен дауылдан кейін мал шығыны көбейіп, жылқылар қырылып жатыр. Тұрғындар жергілікті басылымға бейнежазба жіберіп, дабыл қағуда, жергілікті билік шара қолданып жатқанын айтады деп хабарлайды Orda.kz.

Ең көп шығын Ақшымырау ауылы маңында және Сайөтес пен 7-разъезд аралығында, аудан орталығынан 120–150 шақырым қашықтықта болған. Сондай-ақ теміржол бойына біршама ауыл шаруашылығы жануарлары да қырылып қалған.

Алдын ала мәлімет бойынша, 100-ден астам жылқының өлексесі табылған. Нақты саны әлі анықталуда, өйткені иелері барлық мал басын толық санап үлгермеген.

Тұрғындар әр үйде бірнеше бастан 10 басқа дейін шығын бар екенін айтып отыр.

«Егер төтенше жағдайлар министрлігі мен жергілікті билік көмек көрсетпесе, жағдай одан әрі ушығуы мүмкін», – деп алаңдайды ауыл тұрғындары. 

Жағдайды бағалау үшін 16–17 сәуір күндері мемлекеттік органдар өкілдерінің қатысуымен арнайы комиссия құрылды.

«Комиссия шаруашылық иелерімен бірлесіп жұмыс істеп жатыр. Ауыл шаруашылығы жануарларын сәйкестендіру базасында тіркелген мал шығыны бойынша өтемақы мәселесі қолданыстағы заңнама аясында қаралады. Шешімді төтенше жағдайлар, ауыл шаруашылығы және ветеринария бойынша уәкілетті органдар қабылдайды» деп хабарлады аудандық ішкі саясат бөлімі. 

Іздеу және көмек көрсету үшін Бейнеу ауданынан «Трэкол» жол талғамайтын көлігі жіберілді, дрондар арқылы әуе мониторингі ұйымдастырылды. Облыс әкімінің орынбасары жетекшілік ететін жедел штаб мұнай-газ компанияларына қосымша техника бөлуді тапсырды. Облыстық ауыл шаруашылығы басқармасының басшысы ауданға барып, тұрғындармен кездесіп, жұмыстарды үйлестіруде.

«Салдарды жою үшін барлық күш пен құрал қатыстырылды, көмекке өңірдегі ірі кәсіпорындардың техникасы, ТЖ қызметтері және жергілікті атқарушы органдар тартылды. Суды сору және қалпына келтіру жұмыстары күшейтілген режимде жүріп жатыр. Жағдай ерекше бақылауда. Мал иелерімен байланысып, заманауи мониторинг құралдары мен арнайы техника қолданылуда» деп хабарлады аудан әкімдігі. 

Еске салсақ,  біз 15 сәуір күні Маңғыстау облысында  ауа райы күрт бұзылып, өңірде қатты жел соғып, нөсер жаңбыр төпеп жауып,  үйлерді су алып, шатырлар ұшқанын жазған болатынбыз.

Оқи отырыңыз:

• Маңғыстау облысында қатты нөсер мен дауылдан үйлерді су алып, шатырлар ұшты
• Маңғыстау облысында есірткі жеткізумен айналысқан қылмыстық топ құрықталды
• «Қастық жасады»: Маңғыстаудағы әскерде уланып қаза тапқан сарбаздың туыстары мәлімдеме жасады