Mango негізін қалаушысының ұлы әкесін өлтірді деген күдікпен ұсталды

Каталония полициясы испаниялық Mango сән империясының негізін қалаушы Исак Андиктің ұлы Джонатан Андикті әкесін өлтірді деген күдікпен ұстады, деп хабарлайды Orda.kz. 

Kazinform агенттігінің Еуропадағы меншікті тілшісінің мәліментінше  45 жастағы Джонатан Андик — Mango директорлар кеңесі төрағасының орынбасары. Ол сейсенбі күні таңертең Барселонадағы үйінде қамауға алынып, бірден жауап алу үшін Марторель қаласындағы (Барселона маңы) тергеу сотына жеткізілген.

Испаниядағы ең бай адамдардың бірі саналатын Исак Андик 2024 жылғы 14 желтоқсанда 71 жасында қаза тапқан. Белгілі болғандай, ол Монтсеррат тауларында жаяу серуендеп жүрген кезде шамамен 100 метрлік жартастан құлап кеткен. Оқиға кезінде оның ұлы Джонатан Андик жалғыз куәгер болған.

Алғашында өлім жазатайым оқиға ретінде тіркеліп, іс 2025 жылдың басында жабылған. Алайда 2025 жылдың қазан айында ұлының жауаптарындағы сәйкессіздіктер анықталғаннан кейін тергеу қайта басталды. Полиция Джонатанның ұялы телефонын тәркілеп, зерттеген, сондай-ақ басқа да дәлелдерді саралаған.

Соған қарамастан, Джонатан Андик әкесінің өліміне қатысы барын басынан бері жоққа шығарып келеді. Оның айтуынша, бұл — қайғылы жазатайым жағдай. Андик отбасы да ұлдарының кінәсіз екенін айтып, тергеумен ынтымақтасуға дайын екенін мәлімдеді.

Түркияда дүниеге келген Исак Андик Mango компаниясын 1984 жылы Каталонияда құрған. Қазір брендтің әлем бойынша шамамен 2900 дүкені бар. 2024 қаржы жылының қорытындысы бойынша компанияның сатылымы 3,3 млрд еуродан асып, рекордтық көрсеткішке жеткен. Forbes нұсқасы бойынша, Исак Андик Испаниядағы ең бай бес адамның қатарына кірген.

Оқи отырыңыз:

• Қазақстанға Кения президенті келді
• Түркиядан Жәнібек хан туралы 1350 жылы жазылған қолжазба жеткізілді