«Мәңгілік жадымызда»: 700 мыңнан астам соғыс ардагері туралы мәлімет енгізілді

700 мыңнан астам соғыс ардагері туралы мәлімет «Мәңгілік жадымызда» онлайн-порталында орналастырылды, деп хабарлайды Orda.kz.       

Тарихи жадыны сақтау және екінші дүниежүзілік соғысы жауынгерлерінің ерлігін мәңгі есте қалдыру мақсатында өткен жылы ҚР мәдениет және ақпарат министрлігі «Мәңгілік жадымызда» бірегей онлайн-порталын іске қосты. Ол майдангерлер туралы мәліметтерді жинауға, жүйелеуге, сақтауға және олардың Ұлы Жеңіске қосқан үлесі туралы ақпаратқа ашық қолжетімділікті қамтамасыз етуге бағытталған.

Жеңіс күні – бұл тек өткенді еске алу ғана емес, сонымен қатар болашақ ұрпақ үшін аса маңызды моральдық бағдар, деп атап өтті министр.

«Қоғамдық кеңістікте батырлардың есімдерін мәңгі есте қалдыруға ерекше көңіл бөлінуде. Жеңістің 80 жылдығына орай 500-ден астам екінші дүниежүзілік соғысы ардагерінің есімі көшелер мен даңғылдарға беру туралы шешім қабылданды», – деді министр. 

Аида Балаева 9 мамыр – бұл ұлы естелік, ерлік пен батырлық күні екенін атап өтті. Ол бұл күні біз жеңімпаздар ұрпағының ерлігін алғыс сезіммен еске алып, қаза тапқан батырларды құрметтеп, әлемге фашизмсіз болашақ сыйлаған ардагерлерге шынайы ризашылық білдіру қажттігін айтты.

«Мемлекет басшысы атап өткендей, Қазақстан ортақ жеңіске, жер бетіндегі әділдік пен еркіндіктің салтанат құруына орасан үлес қосты. Әлия Молдағұлова, Мәншүк Мәметова, Талғат Бигелдинов, Қасым Қайсенов, Рақымжан Қошқарбаев, Сергей Луганский, Хиуаз Доспанова, Сағадат Нұрмағамбетов және басқа да көптеген батырлардың есімдері жеңіс шежіресіне мәңгі жазылды. Жүздеген қазақстандық Кеңес Одағының Батыры атағын алды, мыңдаған жауынгер ерлігі үшін ордендер мен медальдармен марапатталды», – деді ол. 

Аида Балаева соғыс жылдарында мәдениет пен әдебиеттің де маңызды рөл атқарғанын еске салды. Екінші дүниежүзілік соғысы кезінде қазақ қаламгерлері тек шығармалар жазып қана қоймай, майданда соғысып, халық пен әскердің рухын көтерді. Мәлік Ғабдуллин, Кемел Тоқаев, Әзілхан Нұршайықов, Қасым Аманжолов, Қасым Қайсенов және басқа да майдангер жазушылар өз шығармаларында ерлік, отансүйгіштік пен соғыс шындығын бейнелеп, келер ұрпаққа құнды әдеби мұра қалдырды.

«Жеңіс күні – бұл тек өткеннің естелігі ғана емес, болашақ ұрпақ үшін маңызды рухани бағдар. Біздің ортақ міндетіміз – соғыс туралы шындықты сақтау, жас ұрпаққа патриотизм, бірлік және ата-баба ерлігіне құрмет құндылықтарын жеткізу. Жеңіс күні құтты болсын! Елімізде әрдайым бейбітшілік пен келісім орнасын!» – деп тілек білдірді Аида Балаева. 

Оқи отырыңыз:

• Қазақстандық партизандардың ұрпақтарына Франция марапаты табысталды
• Депутаттық әдеп мәселесі алғаш рет конституциялық деңгейде бекітіледі
• ОСК: Қазақстанда жақын арада электронды дауыс беру енгізілмейді