Қазақстандық партизандардың ұрпақтарына Франция марапаты табысталды

Астанада Шарль де Голль ескерткіші жанында Франция елшілігі екінші дүниежүзілік соғыс жылдары Тулуза қаласы мен оның маңын азат етуге қатысқан сарбаздар мен партизандарды құрмет көрсетілді, деп хабарлайды  Orda.kz.       

ҚР қорғаныс министрлігі таратқан мәліметте салтанатты рәсімге Франциядағы Қарсыласу қозғалысына қатысқан қазақстандық жауынгерлер — Ахмет Бектаев, Бектемір Байжанов, Нұранбай Баймұратов, Өтеуәлі Бейсенғалиев және Ахмет Субаловтың ұрпақтары қатысқаны хабарланды. 

Рәсім барысында Франция елшісі Қазақстан азаматтарына Франция Қарулы күштер министрі Катрин Вотрен атынан алғыс хат пен «Азат етілген Франция» медалін табыстады.

«Үш жүзден астам қазақстандық француздармен бірге Францияны азат ету үшін шайқасты. Олар Отанынан мыңдаған шақырым алыста жүріп, одақтастарымен иық тірестіре күрделі сынақтарға төтеп берді, көпшілігі өз өмірін құрбан етті. Кезінде генерал Шарль де Голль олардың ерлігін жоғары бағалаған. Бүгін Франция олардың ерлігін ұмытпағанын тағы бір мәрте дәлелдеп отыр», — деп министрдің үндеуін елші оқып берді. 

Қарсыласу қозғалысына қатысушылардың туыстары бұл марапат олардың отбасылық құндылығына айналатынын атап өтті.

«Франция елшілігіне және еліміздің қорғаныс министрлігіне батырлардың рухына көрсетілген құрмет үшін шынайы алғысымды білдіремін. Әкемнің ерлігі жоғары бағаланғаны мен үшін өте маңызды», — деді партизан Бектемір Байжановтың ұлы Сырлыбай Бектеміров. 

Құрмет қарауылы ротасының сүйемелдеуімен Құрлық әскерлері бас қолбасшысының бірінші орынбасары, генерал-майор Қуанышбек Үштаев және Францияның Қазақстандағы төтенше және өкілетті елшісі Сильвиан Гиоге Шарль де Голль ескерткішіне гүл шоқтарын қойды. Бұл ескерткіш француз халқының тәуелсіздігі мен ұлттық бірлігінің символы саналады.

Еске салайық, Қазақстан президенті Қасым-Жомарт Тоқаев жұмыс сапарымен Мәскеуде жүр. Мемлекет басшысы  екінші дүниежүзілік соғыстағы жеңістің 81 жылдығына арналған салтанатты іс-шараларға қатысады.

 
Оқи отырыңыз:

• Тоқаев парадқа қатысу үшін Мәскеуге барды
• Сиреп қалған ардагерлер мен тыл еңбеккерлеріне қандай қамқорлық жасалып жатыр?
• Қасым-Жомарт Тоқаев Мәскеуде Владимир Путинмен кездесу өткізді