Лаңкестің қызы: Қонақ үйде мұғалімімен ұсталған 14 жастағы оқушының кім екені анықталды

Алматы облысындағы «У Розы» қонақ үйінде түнгі сағат 03:00-де ұсталған оқушы — Алматыда 10 адамды, оның ішінде сегіз полицейді өлтірген Руслан Күлекбаевтың қызы екені белгілі болды.

Orda.kz редакциясының дереккөзінің хабарлауынша, қыз 2011 жылы туған. Ол Алматы облысындағы мектептердің бірінде 2025 жылдың 26 ақпанына дейін оқыған.

«26 ақпаннан бастап анасы Алматы қаласының Алмалы ауданына жұмысқа ауысуына байланысты қызын өзімен бірге жаңа мектепке ауыстырды. Анасы мен Руслан Күлекбаев 4–5 жыл бұрын ажырасқан. Қазір әкесі түрмеде», – деді дереккөз.

Еске салайық, осыдан тоғыз жыл бұрын Руслан Күлекбаев Алматы көшелерінде 10 адамды, негізінен полиция қызметкерлерін атып өлтірген. Ол мүлкі тәркіленіп, өлім жазасына кесілген. Алайда өлім жазасына жарияланған мораторийге байланысты өмір бойына бас бостандығынан айырылған.

Еске салсақ, Алматы облысындағы қонақ үйлердің бірінде 14 жасар қызды зорлады деген күдікпен үйірме жетекшісі ұсталды. 6 мамырға қараған түні Өтеген батыр ауылында орналасқан қонақ үйде шамамен сағат 03:00-де рейд кезінде 2011 жылы туған мектеп оқушысы мен оқушылар сарайында домбыра үйірмесінде сабақ беретін ұстаз ұсталды.

Оқу-ағарту министрі Ғани Бейсембаев қонақ үйде оқушымен ұсталған мұғалімге қатысты мәлімдеме жасады.