Әл-Фарабидегі жол апаты: Сотта жаңа жәбірленуші пайда болды

Әл-Фараби даңғылында үш адамның өмірін жалмаған жол көлік апатында қаза тапқан Mercedes жүргізушісінің ағасы Қанат Тілемесов жәбірленуші ретінде жауап берді. Ол Александр Пакқа қатысты ешқандай талабы жоқ екенін айтып, сотқа толық кешірім беру туралы өтініш тапсырды, деп хабарлайды Orda.kz.

Алматыдағы Әл-Фараби даңғылында үш адамның өмірін қиған жол апатына қатысты кезекті сот отырысы өтіп жатыр. Бүгінгі отырыстың басында осы іс бойынша жәбірленуші ретінде танылған марқұм Еламан Тілемесовтің ағасы Қанат Тілемесов жауап берді. Ол Пакқа қатысты ешқандай талап-арызы жоқ екенін айтып, оны кешіргенін жеткізді. Сонымен бірге, соттан заң аясында әділ шешім шығаруды сұрады. 

Бұл жолы сотта Александр Пакпен бірге апат алдында мейрамханада болған полиция қызметкері Әсет Жақсылықовтан жауап алу жоспарланған. Алайда, сотталушы Пак сот залына келмей, процеске онлайн қосылды. Сондай-ақ бүгін осы іс бойынша куәлік беруі тиіс болған полиция қызметкері Әсет Жақсылықовтан жауап алынуы керек еді. Алайда онлайн қосылған Жақсылықов адвокатының қазіргі уақытта процеске қатыса алмайтынын айтып, жауап алуды кейінге қалдыруды сұрады.

Бір қызығы, бұған дейін Александр Пак сот залына уақытша ұстау изоляторынан жеткізіліп келген болса, бұл жолы ол сотқа келмей, онлайн форматта қатысты. 

Еске салсақ, алдыңғы сот отырысында марқұм Еламан Тілемесовтің мүддесін қорғаушы Сергей Черновтың орнына адвокат Гүлмира Бабажанова қатысқан болатын. Сол кезде жаңа қорғаушы іске қатысты материалдармен танысу үшін уақыт сұрап, сот процесі кейінге шегерілген еді.