Қытайда тау беткейі опырылып, сегіз адам қаза тапты

Кеше Қытайдың оңтүстік-батысында болған топырақ көшкіні салдарынан оншақты тұрғын үй мен электр беру желісінің үш тірегі үйінді астында қалды, сегіз адам қаза тапты, деп хабарлайды Orda.kz Жэньминь жибао басылымына сілтеме жасап.

Ірі көлемдегі тау жыныстары мен топырақтың опырылуы таңертең Пэншуй уезі (Чунцин) аумағында, тау етегінде болған. Соңғы мәліметтерге сәйкес, тау беткейінің опырылуы салдарынан сегіз адам қаза тауып, тағы 34 адам із-түзсіз жоғалғандар қатарында.

Оқиға орнында ауқымды құтқару операциясы басталды. Мемлекеттік БАҚ мәліметінше, кемінде тоғыз адам құтқарылған, ал құтқарушылар тас, лай және қирандылар арасынан іздестіру жұмыстарын жалғастыруда.

Үйінді астында қалғандардың нақты саны әлі де белгісіз. Ауданда іздеу-құтқару жұмыстарына 800-ден астам маман тартылған. Қауіпті аймақ маңында тұратын 1,1 мыңнан астам тұрғын эвакуацияланды.

Оқиға орнынан түсірілген кадрларда алып тас кесектері тұрғын үйлерге соғылғаны көрінеді. Екі көпқабатты үй құламай тұрғанымен, олардың құрылымында елеулі зақым бар.

Қытай төрағасы Си Цзиньпин құтқару жұмыстарын жедел ұйымдастыруды, қайталама опырылулардың алдын алуды және зардап шеккендерге қажетті көмек көрсетуді тапсырды. Сонымен қатар, ол Чунцин өңіріндегі геологиялық қауіп-қатерлерге бағалау жүргізуді міндеттеді.

Зардап шеккен аумақтың айналасындағы бір шақырым радиуста су, электр энергиясы және газ беру уақытша тоқтатылды.

Оқи отырыңыз:

• Алматының шыжыған ыстығы 50 жыл бұрын тіркелген температура рекордын жаңартты
• «Қайрат» клубы мәлімдеме жасады: Канье Уэсттің концерті келісілмеген
• Не себепті Қазақстан банктері зейнеткерлерге несие беру рәсімін күрделендірді?