Қытайда «Дельфин» тайфунына байланысты миллионнан астам адам эвакуацияланды

Қытайдың шығысында «Дельфин» тайфунының жақындауына байланысты миллионнан астам адам қауіпсіз жерге көшірілді. Табиғи апат салдарынан елдің бірнеше өңірінде нөсер жаңбыр жауып, су тасқыны мен лай көшкіні қаупі күшейді, деп хабарлайды Orda.kz.

Ең көп адам Чжэцзян провинциясының Вэньчжоу қаласында эвакуацияланған. Мұнда 900 мыңнан астам тұрғын қауіпсіз жерге көшірілді. Шанхайда тағы 215 мыңнан астам адам эвакуацияланды. Тайфун салдарынан Шанхайда соңғы 150 жылдан астам уақыттағы тәуліктік жауын-шашынның ең жоғары көрсеткіші тіркелді. Кейбір аудандарда жауын-шашын мөлшері 400 миллиметрге дейін жеткен.

Синоптиктер алдағы күндері Қытайдың кейбір өңірлерінде 200–400 миллиметрге дейін жаңбыр жаууы мүмкін екенін ескертті. Билік тұрғындарды су тасқыны мен лай көшкіні қаупінен сақ болуға шақырды. Тайфунға байланысты Шанхайдағы әуе қатынасы да шектелді. Қала әуежайларында 1300-ден астам рейс тоқтатылды, қоғамдық көліктің жұмысы уақытша өзгертілді.

Шанхайдағы Яншань портында 500-ден астам шағын және орта кеме қауіпсіз жерге көшірілді. «Дельфин» Қытайға жеткен кезде аса қуатты дауыл болғанымен, кейін әлсірей бастаған. Соған қарамастан синоптиктер нөсер жаңбырдың бірнеше күн бойы жалғасуы мүмкін екенін ескертіп отыр.

Оқи отырыңыз: 

• Абай ілімі – рухани шамшырағымыз: Президент халықты Абай күнімен құттықтады
• Полицейдің көзінше әйелдің басынан тепкен: Жетісу облысындағы базарда болған сұмдық