Полицейдің көзінше әйелдің басынан тепкен: Жетісу облысындағы базарда болған сұмдық

Жетісу облысы Ақсу ауданына қарасты Көлтабан ауылының тұрғыны әлеуметтік желіге алаңдатарлық видео жариялады. Бейнежазбада Балқаш көліне апаратын жол бойында болған жанжалдың соңы ауыр жағдайға ұласқаны көрсетілген, деп хабарлайды Orda.kz.      

Жергілікті тұрғындардың айтуынша, Молалы айналма жолынан Балқаш бағытына шығатын тұста қарбыз-қауын сататын кәсіпкерлер үшін арнайы сауда орны (базар) салынған. Алайда кейбір сатушылар белгіленген орынға бармай, жол жиегінде, айналма жолдың кіреберісінде сауда жасауды жалғастырып келеді.

Бұл жағдай екі бірдей мәселе туындатып отыр. Біріншіден, жол бойындағы ретсіз сауда көлік қозғалысына кедергі келтіріп, жүргізушілер мен жаяу жүргіншілердің қауіпсіздігіне қатер төндіруі мүмкін. Екіншіден, арнайы базарда отырған кәсіпкерлердің саудасы тоқырап, табыстары азайып кеткен.

Тұрғындардың сөзінше, бұл мәселеге байланысты бірнеше рет жергілікті полиция шақырылғанымен, нақты өзгеріс болмаған. Соңғы оқиғада да полиция қызметкерлері шақырылып, заңсыз саудаға шара қолдану сұралған. Алайда жағдай күтпеген жерден ушығып кеткен. Видео кадрларында полиция қызметкерінің көз алдында бір әйел адамға күш қолданылғаны байқалады. Тіпті шағымданушы әйелдің бетінен теуіп жіберген сәті де түсіп қалған.

Қазіргі таңда зардап шеккен әйел орталық ауруханаға жеткізіліп, медициналық көмек алып жатыр.

Оқиға қоғамда үлкен алаңдаушылық туғызды. Жергілікті тұрғындар жәбірленушінің жағдайын жіті бақылап, кінәлі тұлғаларды анықтап, заң аясында қатаң жауапкершілікке тартуды талап етті. 

Ұрып-соғу фактісі бойынша полиция қылмыстық іс қозғады. Оқиғаға қатысушылардың барлығы анықталып, аудандық полиция бөліміне жеткізілді. Алдын ала мәлімет бойынша, күдікті мен жәбірленуші бұған дейін бір-бірін таныған.

Қазіргі уақытта болған оқиғаның барлық мән-жайын анықтауға және жанжалға қатысушылардың әрекеттеріне құқықтық баға беруге бағытталған қажетті тергеу әрекеттері жүргізілуде.

Тергеу нәтижелері бойынша Қазақстан Республикасының қолданыстағы заңнамасына сәйкес процессуалдық шешім қабылданатын болады. ҚР Қылмыстық-процестік кодексінің 201-бабына сәйкес тергеу мүддесіне байланысты өзге ақпарат жария етуге жатпайды.

Оқи отырыңыз:

• Қазақстанда бір апта ішінде 47 орман өрті болды
• Қазақстан мен Грекия КҚК қауіпсіздігі мен Еуропаға мұнай жеткізу мәселесін талқылады