Қытай Қазақстанға 100 млн юань қаражатын өтеусіз бермекші: Алып көршінің ашық алақанының астарында жұмылған жұдырық тұрмаса игі еді 

Қазақстан Республикасы Цифрлық даму, инновациялар және аэроғарыш өнеркәсібі министрлігі «Қазақстан Республикасының Үкіметі мен Қытай Халық Республикасының Үкіметі арасындағы техникалық-экономикалық ынтымақтастық туралы келісімді бекіту туралы» ҚР Үкіметі қаулысының жобасын дайындады, деп хабарлайды Orda.kz.

Құжат мәтінінен түсінгеніміз Қытай Қазақстанға «Қазақстан Республикасының ғарыш саласын дамытуға бағытталатын» 100 000 000 юань мөлшерінде (ҚР Ұлттық банкінің бағамы бойынша - 7,5 млрд теңгеге жуық) өтеусіз грант береді.

Берілген грант мақсатты түрде Қазақстан мен Қытай арасындағы техникалық-экономикалық ынтымақтастықты дамыту мен бәсекеге қабілеттілікті, инвестициялық ахуалды арттыру және ҚР ғылыми-техникалық және өндірістік әлеуетін арттыру үшін ҚР-ға қосымша инвестициялар тартуға жұмсалмақ.

 Жоба 2025 жылғы 24 тамызға дейін, яғни бүгін соңғы күн көпшіліктің талқылауы үшін «Ашық НҚА» порталында орналастырылды.

 
Наурыз айының соңында Қазақстан-Қытай ынтымақтастық жөніндегі комитетінің 12-ші отырысында  сауда, көлік және инвестиция бойынша ынтымақтастықты кеңейту барысы талқылады.

 
Былтыр Бейжіңде Қазақстанның ірі ауылшаруашылық өндірушілері Қытайдың он компаниясымен құны миллиард доллар болатын меморандумдар мен келісімдерге қол қойды.

Сонымен қатар Қазақстан екі ел арасындағы мұнай-газ саласындағы ынтымақтастықты да кеңейтпекші. 

 2025 жылғы 11 тамызда жасанды интеллектті дамыту мәселелері жөніндегі кеңесте президент Қасым-Жомарт Тоқаев Қытайдың жаңа халықаралық ұйым құру туралы бастамасын қолдағаны белгілі.

Экономикалық себептерден бөлек, Қытайдың саяси амбициялары да бар. ҚХР батыс блоктарына қарсы BRICS және басқа бірлестіктердің әлеуетін белсенді пайдаланып отыр. Бұл Қазақстанның қайтадан Батыс пен Шығыс арасындағы жаһандық геосаяси ойындағы маңызды орынға айналғанын білдіреді.