Қырғызстанның экс-депутаты Ұлықбек Қошқаров АҚШ-та курьер болып жұмыс істеп жүр ме?

Жогорку Кенештің экс-депутаты Ұлықбек Қошқаров АҚШ-та курьер болып жұмыс істей ме? Осындай сұрақ әлеуметтік желі қолданушылары арасында қызу талқыланып жатыр, деп хабарлайды Orda.kz. 

Желіде Ұлықбек Қошқаровтың автокөлік жүксалғышына сәлемдеме тиеп жатқан сәті түсірілген видеоны Қырғызстанның 24 KG ақпаратттық порталы жариялады.

Бейнежазба сипаттамасында бұрынғы депутаттың Amazon компаниясында курьер болып жұмыс істейтіні айтылған. Көптеген қолданушылар оның адал еңбекпен айналысып жүргенін атап өтіп, қолдау білдірді. Кейбіреулер оның Қырғызстандағы мемлекеттік қызметтегі кезеңін де еске алды.

Ұлықбек Қошқаров V шақырылымдағы Жогорку Кенештің депутаты болып, «Ата-Жұрт» партиясының құрамында қызмет атқарған. Ол 2017 жылғы президенттік сайлауға қатысқан, ал 2018 жылдың қазан айында Еңбек және әлеуметтік даму министрі болып тағайындалған. 2020 жылы «Биримдик» партиясы атынан Жогорку Кенеш депутаттарын сайлауға қатысқан.

2020 жылғы қазан оқиғаларынан кейін билікке Садыр Жапаров келген соң, Ұлықбек Қошқаров министр қызметінен босатылды. Ол сол кезде өзінің жұмыстан шығарылғанын интернеттен білгенін мәлімдеген болатын.

Белгілі болғандай, соңғы бірнеше жылда Ұлықбек Қошқаров отбасымен бірге АҚШ-тың Чикаго қаласында тұрып келеді. Алайда ол қоғамдық-саяси өмірге белсенді араласпайды, көшіп келуі мен қазіргі қызметі туралы пікір білдірмеген.

Оқи отырыңыз:

• Қырғыз депутаты Қамшыбек Тәшиевтің мемлекеттік төңкеріс жасамақшы болғанын айтты
• Қырғызстанда парламент спикері отставкаға кетті
• Жемқорлыққа қатысы бар: Қамшыбек Тәшиевтің інісі ұсталды