Қырғызстан аузынан қағынып, опық жеген Екатерина Биволды қамауға ордер шығарды

Қырғызстанда бокстан әлем чемпионы Дмитрий Биволдың бұрынғы әйелі Екатерина Биволға қарсы қылмыстық іс қозғалды. Қырғыз елі оны ұлтаралық араздықты қоздырды деп айыптайды, деп хабарлайды Orda.kz 24.kg-ге сілтеп.

 Ел астанасының ІІББ мәліметінше, іс ҚР Қылмыстық кодексінің 330-бабы - «Нәсілдік, этникалық, ұлттық немесе өңіраралық араздықты (алауыздықты) қоздыру» бойынша ашылған. Баптың санкциясы бес жылдан жеті жылға дейін бас бостандығынан айыруды көздейді.

Тергеу қорытындысы бойынша Бивол қырғыздарға, қазақтарға және басқа да ұлттарға тіл тигізгені нақтыланды. 21 қазанда әлеуметтік желілерде осы әйелдің бейәдеп сөзді қарша боратқан бейнесі тарады.

 Кінә Екатеринаға сырттай тағылған. Бұлтартпау шарасы таңдалды - қамауға алу, әйелге іздеу жарияланды.

 «Біз болған оқиғаның барлық жағдайларын тексереміз», деп хабарлады Бішкек қалалық ІІББ. 

Естеріңізге сала кетейік, ресейлік боксшы Дмитрий Биволдың бұрынғы жұбайы Екатерина түрлі ұлт өкілдерін қорлаған видео жарияланғаннан кейін жанжалдың ортасында қалған болатын. Видео шыққаннан кейін екі елдің де  ІІМ тексеріс жүргізді.

Ол Instagram парақшасында қазақстандық аудиторияны сауатсыз, надан халыққа теңеді. Оның айтуынша, қазақстандықтар тек маскүнемдерден бала табуды ғана біледі екен.